قازاقستان پرەزيدەنتى مەملەكەتتىك ساپارمەن قىرعىزستانعا بارادى
بۇل تۋرالى بۇگىن ق ر سىرتقى ىستەر ءمينيسترى ەرلان ىدىرىسوۆ قىرعىزستان رەسپۋبليكاسىنىڭ ءسىم باسشىسى ەرلان ابدىلدايەۆپەن بولعان كەزدەسۋىندە ءمالىم ەتتى، دەپ حابارلايدى قازاقپارات.
«تاڭەرتەڭ بىزدە مەملەكەت باسشىسىمەن مازمۇندى كەزدەسۋ ءوتتى. نۇرسۇلتان نازاربايەۆ مەنىڭ قىرعىز ارىپتەسىمنىڭ ەكىجاقتى قارىم- قاتىناستار، دامۋ بولاشاعى، ايماقتىق جاعدايدىڭ دامۋ كوزقاراستارى جايىنداعى پىكىرىن تىڭدادى. مەملەكەت باسشىسى قازاقستان مەن قىرعىزستان قارىم- قاتىناستارى وزگەلەرگە ۇلگى بولۋى ءتيىس ەكەندىگىن اتاپ ءوتتى جانە ەكى ەلدىڭ ساياسي، ەكونوميكالىق، مادەني- گۋمانيتارلىق، جاستار ساياساتى باعىتىنداعى بايلانىستاردىڭ كەشەندى باعدارلاماسىن جاساقتاۋ قاجەتتىگىن ايتتى، - دەدى ە. ىدىرىسوۆ. - ءبىز مەملەكەت باسشىسىنىڭ قىرعىزستانعا ساپارىن تالقىلادىق. ەكى مەملەكەتتىڭ جوعارى مەملەكەتتىك كەڭەسىنىڭ كەزەكتى وتىرىسىن وتكىزۋ ءۇشىن قازاقستان پرەزيدەنتىنىڭ قىرعىزستانعا مەملەكەتتىك ساپارىن ۇيىمداستىرۋدىڭ ىڭعايلى ۋاقىتىن ىزدەيمىز. مەملەكەت باسشىسى اتاپ وتكەنىندەي، ەڭ باستىسى ساپاردى ساپالى مازمۇنمەن قامتۋ قاجەت».
ءوز كەزەگىندە قىرعىزستان رەسپۋبليكاسىنىڭ سىرتقى ىستەر ءمينيسترى ەرلان ابدىلدايەۆ ەكى تاراپ قازاقستان پرەزيدەنتىنىڭ قىرعىزستانعا مەملەكەتتىك ساپارىن ساپالى ۇيىمداستىرۋعا ۇلكەن كۇش سالاتىندىعىن ءمالىم ەتتى.
«ءبىز قازاقستان پرەزيدەنتى نازاربايەۆتىڭ مەملەكەتتىك ساپارى بولادى دەپ جوسپارلاپ وتىرمىز جانە ونى دايىنداۋعا بەلسەندى كۇش سالامىز. مەنىڭشە، ساپار جىل سوڭىنا دەيىن نەمەسە كەلەسى جىلدىڭ ءبىرىنشى توقسانىندا وتەدى. جوعارى مەملەكەتتىك كەڭەس وتىرىسىندا وتە ماڭىزدى تاقىرىپتارمەن تولى بولادى. اتاپ ايتقاندا، شەكارانى دەماركاتسيالاۋ مەن رەجيمىن انىقتاۋ، سونىمەن قاتار ءبىزدىڭ ەلدەردىڭ اراسىنداعى قارىم- قاتىناستاردىڭ كەشەندى باعدارلاماسىن تالقىلاۋ. نۇرسۇلتان ءابىش ۇلى ەكى ەلدەردى بارلىق سالادا جاقىنداستىرا تۇسەتىن باعدارلامانى قولدادى»، - دەدى قىرعىزستاننىڭ ءسىم باسشىسى.
اۆتور: جاسۇلان جولدىبايەۆ
