اقپارات جانە مەدياكوممۋنيكاتسيا اكادەمياسىن قۇرۋ ۇسىنىلدى

استانا. قازاقپارات - ق ر اقپارات جانە كوممۋنيكاتسيالار ءمينيسترى داۋرەن ابايەۆ حابارلاعانداي، «اشىق نورماتيۆتىك قۇقىقتىق اكتىلەر» پورتالىنا «اقپارات جانە كوممۋنيكاتسيالار ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە تولىقتىرۋلار مەن وزگەرتۋلەر ەنگىزۋ تۋرالى» زاڭ جوباسىنا قاتىستى تۇجىرىمداما قوعام تالقىلاۋىنا ۇسىنىلعان ەدى.

ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى «جۋرناليستيكا جانە ساياساتتانۋ» فاكۋلتەتى «تەلەراديو جانە قوعاممەن بايلانىس» كافەدراسىنىڭ دوتسەنتى مىرزانتاي جاقىپ بۇل تۇجىرىمداما اياسىندا اقپارات جانە مەدياكوممۋنيكاتسيا اكادەمياسىن قۇرۋدى ۇسىندى، دەپ حابارلايدى قازاقپارات.

اقپارات جانە كوممۋنيكاتسيالار ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە تولىقتىرۋلار مەن وزگەرتۋلەر ەنگىزۋ تۋرالى» زاڭ جوباسىنا جۋرناليستيكا، قوعاممەن بايلانىس، باسپا ءىسى، مەدياكوممۋنيكاتسيا سەكىلدى اقپاراتتىق كوممۋنيكاتسيا سالاسىنىڭ جوعارى بىلىكتى ماماندارىن - باكالاۆرلاردى، ماگيسترلەردى جانە PhD دوكتورلارىن دايارلاۋ ماسەلەسىنە بايلانىستى اقپارات جانە كوممۋنيكاتسيالار مينيسترلىگىنىڭ قۇزىرەتتىلىكتەرى مەن قۇقىقتارىن ناقتىلايتىن ارنايى قۇقىقتىق قاعيدالار ەنگىزىلگەنى ءجون. قازىرگى كەزدە ەلىمىزدە "جۋرناليستيكا"، "قوعاممەن بايلانىس" جانە "باسپا ءىسى" ماماندىقتارى بويىنشا جوعارى ءبىلىمدى ماماندار ءبىلىم جانە عىلىم مينيسترلىگىنىڭ جۇيەسىمەن دايارلانىپ كەلەدى.

كوپ جاعدايدا ءبىلىم جانە عىلىم مينيسترلىگىنىڭ باسشىلارى مەن قىزمەتكەرلەرى بۇل ماماندىقتاردىڭ ەرەكشەلىكتەرىن بىلە بەرمەيدى جانە تۇسىنە دە بەرمەيدى. سوندىقتان، بۇقارالىق اقپارات قۇرالدارىن بىلىكتىلىگى جوعارى ماماندارمەن قامتاماسىز ەتۋ جونىندەگى وزەكتى ماسەلەلەردى شەشۋدىڭ ءبىر جولى رەتىندە ەلىمىزدە جۋرناليستيكا، قوعاممەن بايلانىس، مەدياكوممۋنيكاتسيا، باسپا ءىسى جانە ت، ب، ماماندىقتار بويىنشا ماگيسترلەر مەن PhD دوكتورلارىن دايارلاۋ ماقساتىندا اقپارات جانە كوممۋنيكاتسيالار مينيسترلىگىنە تىكەلەي باعىنىستاعى دەربەس اقپارات جانە مەدياكوممۋنيكاتسيا اكادەمياسىن قۇرۋدى ۇسىنامىن»، - دەيدى م. جاقىپ.