قازاقتان عىلىمعا بەلگىسىز انتيگەن تابىلدى

استانا. قازاقپارات - استاناداعى ترانسفۋزيولوگيا عىلىمي- وندىرىستىك ورتالىعى ماماندارى قازاقتىڭ بويىنان ترانسپلانتولوگيا بارىسىندا الماستىرىلعان مۇشەنىڭ ۇلاسىپ كەتۋىنە جول بەرمەيتىن انتيگەن تاپتى، دەپ حابارلايدى قازاقپارات.

گەرمانياداعى ادامنىڭ لەيكوتسيتارلىق انتيگەندەرىن تىركەيتىن ارنايى ۇيىم اتالمىش انتيگەندى ءوز بازاسىنان تاپپاعان جانە قازاقستاندىق مامانداردىڭ جاڭالىعىنا تاڭدانىس ءبىلدىردى.

«ءبىزدىڭ بارلىعىمىزدا لەيكوتسيتارلىق انتيگەندەر بار. ولاردىڭ سايكەسسىزدىگى دونوردىڭ مۇشەسىن رەتسيپيەنتكە اۋىستىرۋ كەزىندە قيىندىقتار تۋعىزۋى ىقتيمال. سوندىقتان ءبىز ەكەۋىنىڭ دە گەندەرىن قارايمىز. ولاردىڭ سايكەستىگىن تەكسەرەمىز. ولار راستالعان كەزدە عانا ادام مۇشەلەرى مەن تىندەرىن الماستىرا الامىز. ءبىز پاتسيەنتتى تەكسەرۋ كەزىندە الەمگە بەلگىسىز، عىلىمدا تىركەلمەگەن مۇلدەم جاڭا گەندەرگە تاپ بولدىق. ولار بەلگىلى ءبىر دەرتكە اسەر ەتپەيدى، بەلگىلى ءبىر پاتولوگيالارعا دا سوقتىرمايدى. ولاردى بۇرىن انىقتامالعانىنىڭ سەبەبى، قازاقتاردى مۇنداي دەڭگەيدە ءالى ەشكىم زەرتتەپ كورمەگەن»، - دەيدى يممۋنولوگيالىق تيپيرلەۋ زەرتحاناسىنىڭ مەڭگەرۋشىسى ايدا تۇرعانبەكوۆا.

ترانسفۋزيولوگيا عىلىمي- وندىرىستىك ورتالىعى ءتوراعاسىنىڭ ورىنباسارى ءسانيا ءابدىراحمانوۆا «قازاقپارات» تىلشىسىنە بەرگەن سۇحباتىندا، «DQB1*03:82» دەگەن اتاۋعا يە بولعان جاڭا انتيگەن وتە قاراپايىم ەكەندىگىن ايتتى، دەگەنمەن ول ءبىرقاتار قيىندىقتار تۋعىزۋى ىقتيمال.

«ءبىز بۇل مۋتاتسيانىڭ اسەرىنەن ەمەس، اتادان بالاعا تۇقىم ارقىلى تارالىپ كەلە جاتقان نارسە ەكەنىن دالەلدەۋ ءۇشىن وتباسىلىق تەكسەرىس وتكىزدىك. دالەلدەدىك، ناتيجەلەرىن گەرمانياعا جىبەردىك. ولار بۇل انتيگەننىڭ، راسىمەن، بۇرىن- سوڭدى ەشكىمنەن تابىلماعانىن ءمالىم ەتتى. بۇل گەن وتباسىنداعى تەك ءبىر ادامنان تابىلىپ وتىر. ول دەرتكە شالدىقپاسىن دەپ تىلەيمىز. سەبەبى ول گەن مۇشە الماستىرۋ كەزىندە كەرى اسەر بەرۋى ىقتيمال. وعان دونور تابۋ قيىن بولادى. ول الەمدە جالعىز»، - دەدى ءسانيا ءابدىراحمانوۆا.

ايتا كەتۋ كەرەك، اتالمىش گەن سەكۆەنيرلەۋ كەزىندە، قۇنى 80 ميلليون تەڭگە بولاتىن قۇرىلعىنىڭ ارقاسىندا تابىلدى.

«وسى زەرتحانانىڭ ارقاسىندا 2011 -جىلدان باستاپ قازاقستاندا ترانسپلانتولوگيا قارقىندى دامىدى. بۇل زەرتحاناسى بولماسا، ترانپلانتولوگيا جاساۋ مۇمكىن ەمەس. سوندىقتان قان ۇلگىلەرى ەڭ الدىمەن وسىندا تۇسەدى»، - دەيدى س. ءابدىراحمانوۆا.

(انتيگەندەر (antigen؛ كونە گرەكشە: anti - كارسى؛ كونە گرەكشە: genesis - شىعۋ تەگى) - ورگانيزمگە ءارتۇرلى جولدارمەن ەنگەن جانە وعان قارسى جۇرەتىن يممۋندىق رەاكسيالار ناتيجەسىندە ادام مەن جانۋارلار دەنەلەرىندە قارسى دەنەلەر (انتيدەنەلەر) تۇزىلەتىن، تابيعاتى ورگانيزمگە جات ءىرى مولەكۋلالى پروتەيندىك زاتتار جانە پوليساحاريدتەر؛ قانعا ەنىپ، ەرەكشە انتيدەنەلەردى قالىپتاستىرۋعا قابىلەتى بار پوليساحاريدتى نەمەسە اقۋىزدى زاتتار.)

 

اۆتور: جاسۇلان جولدىبايەۆ