مەملەكەتتىك قىزمەتكەرلەردىڭ مانساپتىق ءوسۋى ءۇش ەسەگە ارتتى
بۇل تۋرالى بۇگىن ق ر پارلامەنتى سەناتىنداعى دوڭگەلەك ۇستەلدە ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگى ءتوراعاسىنىڭ ورىنباسارى ايگۇل شايىموۆا ءمالىم ەتتى، دەپ حابارلايدى قازاقپارات.
«بۇرىندارى جۇمىسىن ءتيىمدى اتقاراتىن مەملەكەتتىك قىزمەتكەر جىلداپ ءبىر ورىننان وسپەي وتىرا بەرەتىن. وسى رەتتە مەملەكەتتىك قىزمەت جۇيەسىنە جاڭادان قوسىلعاندار جەمىستى جۇمىس ىستەپ جۇرگەندەردىڭ ۇستىنەن باسشى بولىپ كەلە بەرەتىن. بۇنداي جاعداي ادامداردىڭ ەڭسەسىن ءتۇسىرىپ، ادىلەتسىزدىكتى بايقاتتى جانە مەملەكەتتىك قىزمەتتىڭ پەرسپەكتيۆالارىنا جاعىمسىز قاتىناستاردى قالىپتاستىرىپ وتىردى. قازىرگى كەزدە وندايعا جول بەرىلمەيدى. سوندىقتان دا جاڭا مودەل قىزمەتكەرلەردىڭ تەك تومەنگى ساناتتاردان جوعارىلاۋىن ەسكەرەدى. بىزدە ءتيىستى ناتيجەلەر بار. جىل باسىنان بەرى تومەنگىدەن جوعارى لاۋازىمدارعا 3163 مەملەكەتتىك قىزمەتكەر تاعايىندالدى. بۇل وتكەن جىلدىڭ سايكەس كەزەڭىمەن سالىستىرعاندا ءۇش ەسەگە ارتىق»، - دەدى ا. شايىموۆا.
ونىڭ سوزىنە قاراعاندا، مەملەكەتتىك قىزمەتكە تۇرۋ ءۇشىن ءبىرقاتار تالاپتاردى ورىنداۋ كەرەك. ونىڭ ءبىرى مىندەتتى تۇردە ءۇش ايلىق سىناق مەرزىمىنەن وتۋگە قاتىستى، ياعني مەجەلى قاداعالاۋ ناتيجەسى بويىنشا ول مەرزىم ۇزارتىلۋى مۇمكىن. اعىمداعى جىلى مەرزىمىن ۇزارتپاستان سىناقتان 2273 ادام ءوتتى.
اۆتور: رۋسلان عابباسوۆ
