گەليوس يميدجىنە قاساقانا نۇقسان كەلتىرۋگە ارەكەت جاسالدى دەپ مالىمدەدى

استانا. قازاقپارات - الەۋمەتتىك جەلىلەردە گەليوس جانارماي قۇيۋ ستانساسىندا اۆتوكولىككە بەنزيننىڭ ورنىنا «اۋا» قۇيىپ جاتقان بەينە روليك ارانداتۋشىلىق ارەكەت دەپ باعالانىپ، بۇل ءوز كەزەگىندە كومپانيا يميدجىن ءتۇسىرۋ ءۇشىن قاساقانا جاسالدى دەگەن تۇجىرىم ايتىلدى. بۇل تۋرالى قازاقپارات اگەنتتىگىنىڭ ساۋالىنا «گەليوس» كومپانياسىنان بەرىلگەن جاۋاپتا ايتىلعان.

«قىزمەتتىك تەكسەرۋ بارىسىندا اتالعان جانار- جاعارماي قۇيۋ ستانساسىنا سول كۇنى كەلگەن كليەنت كاسسيردەن 85 تەڭگەگە ا ي-92 ماركالى بەنزينىن قۇيۋدى ءوتىنىپ، ءوز ەركىمەن بەنزين قۇياتىن پيستولەتتى الىپ، كولىگىنىڭ باگىنە سالعان. سونىمەن بىرگە ول وتىن قۇياتىن كەزدە باكتان پيستولەتتى الىپ شىعىپ جانە ونى شۇرىپپەسىن تومەن قاراي تۇسىرگەن، ال شلانگىنى جوعارۋ كوتەرۋ ارەكەتىمەن تەحنيكالىق پروتسەسستى بۇزدى»، - دەپ ءتۇسىندىردى كومپانيا.

سونىمەن قاتار كومپانيا وكىلدەرى بەينە روليك اۆتورى كولونكوعا ستانسانىڭ قىزمەتكەرىن جاقىنداتپاعانىن جانە وسى ارەكەتىمەن پيستولەتكە زاقىم كەلتىرگەنىن اتاپ ءوتتى.

«ونىڭ كولىككە 85 تەڭگەگە بەنزين قۇيۋى، سونداي-اق بەينە ءتۇسىرىلىم جاساۋ ارەكەتتەرىندە «گەليوس» كومپانياسى تۋرالى جاعىمسىز پىكىر قالىپتاستىرۋ بويىنشا قاساقانا ماقسات بولدى. بەينە روليكتى زەرتتەۋ كەزىندە پيستولەتتى تومەن تۇسىرگەن كەزدە ەسەپتەگىشتە ساندار ارتقانى، ال پيستولەتتى كوتەرگەن كەزدە ولشەمدەر مەن اقشا سوماسى ازايعانى بايقالادى. اتاپ ايتقاندا، كولونكا ەسەپتەگىشى باياۋ قارقىنمەن اينالعانىن ەسكەرە وتىرىپ، شلانگىدە وتىننىڭ بار ەكەندىگىن اڭعارۋعا بولادى. الايدا كولونكا پيستولەتىنىڭ شۇرىپپەسى تومەن ءتۇسىپ تۇرعاندىقتان، بەنزين سىرتقا قاراي اقپادى»، - دەپ ءتۇسىندىردى گەليوس.