باس پروكۋراتۋرا يۋري پاكتىڭ ۇكىمىنە قاتىستى تۇسىنىك بەردى
«پاكتىڭ جازاسى بارىنشا تومەن دەڭگەيدە، 2 جىل (سانكسيا 6 ايدان 6 جىلعا دەيىن باس بوستاندىعىنا ايىرۋدى كوزدەيدى) باس بوستاندىعىنان ايىرۋ تۇرىندە بەلگىلەندى.
سوت ونىڭ 13 جانە 17 جاستاعى ەكى بالاسىنىڭ جانە جازاسىن اۋىرلاتاتىن جايتتاردىڭ بولماۋى سىندى جازانى جەڭىلدەتەتىن سەبەپتەردى ەسكەردى. سوت شارتتى تۇردە جازا تاعايىنداۋ نەمەسە ۇكىمدى كەيىنگە قالدىرۋ ءۇشىن ەشقانداي نەگىز قاراستىرعان جوق.
قازىرگى ۋاقىتتا ۇكىم زاڭدى كۇشىنە ەنبەگەن. پاك ۇكىم كوشىرمەسىن 7 -قازاندا الدى جانە وسى ۋاقىتتان 23 -قازانعا دەيىن ول وبلىستىق سوتقا اپپەلياتسيالىق شاعىم جاساي الادى. قىلمىستىق ءىس جۇرگىزۋ كودەكسىنە سايكەس ۇكىم زاڭدى كۇشىنە ەنگەنگە دەيىن پروكۋراتۋرا وعان ارالاسا المايدى. ءىس اپپەلياتسيالىق قايتا قارالعان جاعدايدا وبلىستىق پروكۋراتۋرا وكىلدەرى شىعارىلعان ۇكىمنىڭ زاڭدىلىعى تۋرالى قورىتىندى بەرەدى. مۇنان ارى اپپەلياتسيا شەشىمىمەن سوتتالۋشى كەلىسپەگەن جاعدايدا ول جوعارعى سوتقا نەمەسە باس پروكۋراتۋراعا ءوزىنىڭ دايەكتەرى مەن نارازىلىقتارىن كورسەتە وتىرىپ شاعىم جاساۋعا قۇقىلى»، - دەپ حابارلادى ق ر باس پروكۋراتۋراسىنىڭ باسپا ءسوز قىزمەتىنەن.
ايتا كەتەيىك، بۇگىن داريعا نازاربايەۆا قاراعاندىدا سوتتالعان ۇستاز يۋري پاكتىڭ ءىسى بويىنشا قۇجاتتاردى تىڭعىلىقتى قاراپ شىعۋ تۋرالى باس پروكۋراتۋراعا ساۋال جولداعان ايتقان بولاتىن.
ەستەرىڭىزگە سالا كەتسەك، فيزيكا ءپانىنىڭ مۇعالىمى يۋ. پاكقا تىركەلگەن ۇيالى تەلەفوننان «112» جەدەل قىزمەتىنە «س ۋ م» ساۋدا ۇيىنە بومبا قويىلعاندىعى تۋرالى اقپارات تۇسكەن. تەرروريستىك اكتى تۋرالى اقپاراتتىڭ ناتيجەسىندە ساۋدا ۇيىنە جەدەل قىزمەتتەر مەن قۇقىق قورعاۋ ورگاندارى بارىپ، ول جەردەن 3 مىڭنان استام ادام قاۋىپسىز جەرگە كوشىرىلگەن. قازىبەك ءبي اۋداندىق سوتى ايىپتاۋشى تاراپتىڭ دا، قورعاۋشى تاراپتىڭ دا دالەلدەرىن تىڭعىلىقتى تەكسەرىپ، ونىڭ ناتيجەسىندە ايىپتاۋ ۇكىمىن شىعارعان بولاتىن.
