جاپون قىزى مايا قالاي مۇسىلمان بولدى؟
پەندەنىڭ ءبارىنىڭ باسىنان وتەتىن دۇنيە بولسا دا ءولىم تۋرالى ويدان قورىققانىمنان ءتۇن بالاسىنا كىرپىك قاقپاي، ۇيىقتاي الماي شىعاتىن كۇندەرىم كوپ بولاتىن. اتا-انامنان جىلاپ تۇرىپ: «ولگەن سوڭ ماعان نە بولادى؟»، «اقىر ولەتىن بولعان سوڭ نەگە تۋدىم ەكەن؟» - دەپ سۇرايتىنمىن. ادامنىڭ قيالى مەن ساناسىنان تىس ءبىر تىلسىم كۇشتىڭ بارىن سەزەتىنمىن. ءبىراق ول كەزدە بۇل تىلسىمنىڭ اللانىڭ قۇدىرەتى ەكەنىن تۇسىنبەگەن ەدىم.
التى جىلىمدى ميسسيونەرلىك پروتەستانتتىق حريستيان مەكتەبىندە وتكىزدىم. ونداعى جىلدارىم سانامدا وشپەستەي ءىز قالدىردى. كەرەمەت اسەر الدىم. قۇداي تۋرالى العاشقى ءبىلىمدى حريستياندىق بەردى. ونىڭ بار ەكەنىنە سەندىردى. مۇندا قۇدايدىڭ ماحابباتى مەن مەيىرىمىنە كوز جەتكىزدىم. پايعامبارلار مەن اقىرەت تۋرالى ءبىلدىم. دەگەنمەن، تولىق سەنە الماعان جايتتار بار ەدى.
ءبىر كۇنى ىنجىلدەن ساباق بەرەتىن ۇستازىمنان: «نەگە يسا پايعامبار: «Eli, Eli, lamasabachthani?» (ماتفەيا 27:46) دەگەن؟ ءوزى قۇداي بولسا، بۇلاي دەۋىنىڭ سەبەبى نە؟» - دەپ سۇرادىم. ياعني، ايقىشقا تاڭىلعان ساتتە، ول: «جاراتقان يەم، جاراتقان يەم، مەنى نەگە جالعىز قالدىردىڭ؟» - دەيدى. ۇستازىم: «كونە وسيەتتىڭ ساۋەگەيلىگىن ورىنداۋ ءۇشىن سولاي دەدى»، - دەپ جاۋاپ بەردى. ۇستازىمنىڭ جاۋابىنا كوڭىلىم تولمادى.
يسلامدى تولىق تۇسىنسەم دە، مۇسىلمان بولۋعا قورىقتىم
العاش يسلاممەن جازعى دەمالىس كەزىندە فرانسياعا فرانسۋز ءتىلىن ۇيرەنۋگە بارعاندا تانىستىم. مەنىڭ مەكتەبىم ورنالاسقان مارسەلدە مۇسىلمان يمميگرانتتارىنىڭ ءىرى قاۋىمداستىعى بار ەدى. كۋرسىم بىتكەن سوڭ اراب مادەنيەتىنە دەگەن قىزىعۋشىلىعىم جەتەلەپ جەرورتا تەڭىزى ارقىلى تۋنيسكە ۇشتىم. جەرورتا تەڭىزىنىڭ باسقا جاعالاۋىنان جارتىلاي جالاڭاش بيكينيدەگى ايەلدەردى كورىپ كەلگەن مەن ءۇشىن مۇنداعى جاعاجايدان باستان اياق ورانعان ايەل زاتىن كورۋ كۇتپەگەن جاعداي بولدى. قاتتى تاڭعالدىم. كەيىن باداۋيلەردىڭ ۇيلەنۋ تويىنا شاقىرتۋ الىپ، ونداعى قالىڭدىقتىڭ تەك كوزى كورىنەتىن تەسىگى بار ءبىرتۇتاس اپپاق كيىمنەن ءوز تويىن تاماشالاپ وتىرعانىن كورىپ، ودان بەتەر تاڭداندىم. ول توي بارىسىندا ءجۇزىن قوناقتارعا سول كۇيى كورسەتپەدى.
ەلىمە جەتكەن سوڭ ءوزىم العان مادەني شوكتان ايىعۋ ءۇشىن يسلام تۋرالى، اراب مادەنيەتى جايىندا وقي باستادىم. اللاعا شۇكىر، مەنىڭ ۋنيۆەرسيتەتىمدە مۇسىلماندىقتى قابىلداعان پروفەسسور وكۋدا اتتى جاپون وقىتۋشى بار ەكەن. مەن ونىڭ يسلام تەولوگياسىنا ارنالعان لەكسيالارىنا قاتىسا باستادىم. زەرتتەۋ بارىسىندا يسلام - جابايى ءارى ارتتا قالعان ءدىن ەمەس، وتە پاراساتتى ءارى سانالى ءدىن ەكەندىگىنە كوز جەتكىزدىم. يسلام حريستياندىق تۋرالى بارلىق قاناعاتتانباعان سۇراقتارىما تولىق ءارى ناقتى جاۋاپ بەردى. جۇرەگىممەن يسلامنىڭ اقيقات ءدىن ەكەندىگىن سەزىندىم. ءبىراق سەزىنگەنىمدى مويىنداۋعا اسىقپادىم، زەرتتەۋىمدى جالعاستىرا بەردىم. بۋدديزم مەن سينتويزمدى قاراستىردىم. زەرتتەۋگە تەرەڭدەگەن سايىن يسلام ماعان جاقىنداي بەردى، ءبىراق مۇسىلماندىققا قادام جاساۋعا قورىقتىم. ماعان مۇسىلمان الەمى لاس، حاوسقا تولى سياقتاندى، ول الەممەن بايلانىسۋ سانالى شەشىم ەمەستەي كورىنەتىن. مۇسىلمانداردان قورىقسام دا، يسلامدى ءتۇسىنۋ جانىمدى راحاتقا بولەي ءتۇستى. ءسويتىپ جۇرگەندە بىردە- ءبىر مۇسىلمانمەن ارالاسپاعانىم ەسىمە ءتۇستى.
ناعىز مۇسىلماندارمەن قارىم- قاتىناسقا مۇقتاجدىعىمدى سەزىندىم. سولاي توكيو مەشىتىندەگى «Yuai» اراب مەكتەبىندە وقيتىن مىسىرلىق ايەلدەرگە ارنالعان اپتا سايىنعى وقۋعا قاتىسا باستادىم. ساۋد ارابياسى ەلشىلىگىندە وتەتىن شارالارعا دا اتسالىسىپ ءجۇردىم. مۇسىلماندارعا سانسىز سۇراقتاردان تۇراتىن ۇزىن- سونار حاتتار جازا باستادىم. اللاعا شۇكىر، ۋاقىت وتە كەلە ۇرەيىم باسىلدى. ەندى يسلامدى قابىلداۋدى كەيىنگە قالدىرۋدىڭ ەش سەبەبى جوق ەكەنىن ءتۇسىندىم.
ءشاحادات ايتۋ ءوزىم كۇتكەننەن بەتەر اسەر ەتتى
مۇسىلماندىقتى قابىلداعاننان كەيىنگى ۇستاعان ورازام مۇسىلمان بولماي تۇرىپ ۇستاپ كورگەن ورازامنان مۇلدە بولەك بولىپ شىقتى. نامازعا جىعىلعان سوڭ بۇرىنعىمنان دا بەتەر قۇدايدان قورقا الاتىنىمدى ۇقتىم. يسلامدى ءتۇسىنۋىم ەسكى بىلىمىمە ساي بولعانىن ەسكەرە وتىرىپ مەنى وزگەلەردىڭ قابىلداۋى ءۇشىن ءوزىمنىڭ شەشىمىم ناقتى ءارى تاباندى بولۋى كەرەكتىگىن ءتۇسىندىم. العاش رەت ءشاحادات ايتقانىمدا امەريكالىق قارجىلىق فيرمادا ساتۋشى بولىپ جۇمىس ىستەيتىنمىن. ءوزىمنىڭ يسلامدى تاڭداعانىم تۋرالى باستىعىم مەن ارىپتەستەرىمە وپ- وڭاي ايتتىم. ەشبىر قيىندىق سەزىنبەدىم. ىشىمدىك پەن تىيىم سالىنعان ەتتى جەۋدەن باس تارتتىم. ورازا ۇستادىم، نامازعا جىعىلدىم. باسىندا ۋاقتىلى ناماز وقۋ ءبىراز قيىندىق تۋدىردى. دەگەنمەن، حيدجاب كيۋگە تاۋەكەلىم بارمادى. حيدجاب كومپانياداعى كليەنتتەرىمە كەرى اسەر ەتەر دەپ ويلادىم. ءوزىم جۇمىس ىستەپ جۇرگەن كومپانياعا زيانىم ءتيىپ كەتەر دەپ قورىقتىم.
وسىلاي ءبىر جىل وتە شىقتى. ەرتە مە، كەش پە بۇل كومپانياداعى جۇمىسىمنان باس تارتۋعا تۋرا كەلەتىنىن ءىشىم سەزىپ ءجۇردى. ويتكەنى، ول كومپانيا ۇنەمى ءوسىمى بار قارجىلىق وپەراتسيالارمەن شۇعىلداناتىن. ال، ولاردى يسلام قۇپتامايتىن. سولاي جۇمىسىمدى تاستاپ، مالايزياعا اسپيرانتۋراعا ءتۇستىم. وندا يسلام قارجىسىن زەرتتەۋگە بەكىندىم. جۇمىستان شىققان سوڭ حيدجاب كيىپ، نامازىمدى ۋاقتىلى وقيتىن بولدىم.
بۇرىن ومىردە بولىپ جاتاتىن ادىلەتسىزدىك پەن باقىتسىزدىققا كوپ رەنجيتىن ەدىم. ءبىراق اللانىڭ ۇلى ادىلەتىن بىلگەن سوڭ، اقىرەت كۇنىنە سەنگەن سوڭ ساباما ءتۇستىم. اللانىڭ سۇيگەن قۇلىنا اينالعىم كەلگەندىكتەن باسقا سالالاردا، مىسالى، جۇمىستاعى جەتىستىككە، ەلدىڭ پىكىرىنە، ۇلتقا ءبولىنۋ مەن باسقا دا ماسەلەلەردە كىرىپتارلىق كۇيگە تۇسكەنىمدى كوردىم.
اللاعا شۇكىر، ەسەسىنە مۇسىلمان ەمەس وتباسىمدا، دوستارىمنىڭ اراسىندا، ارىپتەستەرمەن ەش قيىندىق تۋعان ەمەس. ولاردىڭ بارلىعى مەنىڭ شەشىمىمە قۇرمەتپەن قارادى. ءبىراق مۇسىلماندارمەن ءبىراز قيىندىقتار ورىن الدى.
تۋعاننان مۇسىلمان جاندار يسلامدى ءوز داستۇرىمەن ارالاستىرىپ جىبەرەدى ەكەن. ولاردىڭ كوپشىلىگى يسلامنىڭ نەگىزگى ءتورت مەكتەبى (حانافي، شافيي، حانبالي، ماليكي) اراسىنداعى بولماشى ايىرماشىلىقتاردى بىلمەيدى. نەمەسە ولاردىڭ يسلام تۋرالى پىكىرى ءارقالاي. وسىلاي كەتە بەرەدى. باسىندا مۇسىلمانداردىڭ يسلامدا بار نارسەنى وزدەرى مويىندامايتىنى تاڭ قالدىراتىن. ءبىراق ولار سەنىمدى تۇردە سويلەيتىن. سوندىقتان قازىر جاڭا بىردەڭە بىلگەندە ءسوزىمنىڭ ءبارىن دەرەككوزىمەن، سىلتەمەسىمەن قۋاتتاپ الۋعا تىرىسامىن.
مەن يسلامدى جاقسى كورەمىن. ويتكەنى، يسلام ادامعا رۋحاني، ءتاني، تاجىريبەلىك، تەوريالىق، ءوز مەنىڭدى تانۋعا ءارى الەۋمەتتى سىيلاۋعا جەتەلەيتىن كەشەندى ءومىر ءسۇرۋ فورمۋلاسىن بەرەدى. باسقا بىردە ءبىر ءدىن مۇنداي تولىق ەمەس. بارلىق ءدىن مەيىرىمدى ناسيحاتتايدى. يسلامنىڭ ەرەكشەلىگى ونىڭ جان- جاقتىلىعىندا دەپ بىلەم.
سوندىقتان نيەتىمىز دۇرىس بولسا، ۇيقىمىزدىڭ ءوزى قۇلشىلىق سانالۋى مۇمكىن ەكەن. ول ءۇشىن ادامعا زيانى تيەتىن باسقالاي شارتتىلىقتاردى ورىنداۋ كەرەك ەمەس. ماسەلەن، دۇنيەدەن بەزىپ، تاقۋا بولۋدىڭ، نەكەدەن باس تارتىپ، ءوزىڭدى جازالاۋ نەمەسە ءبىر ۇيدەن ەكىنشى ۇيگە دەيىن عانا ءومىر بار دەۋ اسىلىق.
ءومىردىڭ ءار ساتىندە اللانىڭ قۇدىرەتىنە باس يە الاتىنىمىز، كەشىرىم سۇراي الاتىنىمىز شەكسىز مەيىرىمدىلىكتەن ەمەس پە؟ ادام ومىرىنە زور ءۇمىتتى اللا بەرەتىنى عاجاپ ەمەس پە؟!
اۋدارعان شىنار ءابىلدا
islam.kz
