ۇكىمەتتىڭ سيفرلىق ترانسفورماتسياسى حالىققا نە بەرەدى

استانا. قازاقپارات - بۇگىندە الەم ەلدەرى مەملەكەتتىك قىزمەتتەردى ەلەكتروندى فورماتقا اۋىستىرۋ ارقىلى بيۋدجەتتىڭ قىرۋار قاراجاتىن ۇنەمدەپ كەلەدى.

ساراپشىلاردىڭ ەسەبىنە سايكەس، دۇنيەءجۇزى بويىنشا ۇكىمەتتىڭ سيفرلىق ترانسفورماتسياسىن جۇزەگە اسىرۋدىڭ ارقاسىندا 1 تريلليون دوللاردان استام اقشا ۇنەمدەلىپ وتىرادى. ماسەلەن، اۆستريا استاناسى - ۆەنانىڭ ءوزى ەلەكتروندى قىزمەتتەرمەن جىل سايىن 2 ميلليون ەۋرونى ۇنەمدەيدى، دەپ حابارلايدى قازاقپارات ءتىلشىسى.

قازاقستان دا اتالعان باعىتتا ءبىراز شارۋانىڭ باسىن قايىرىپ ۇلگەردى. الايدا مەملەكەتتىك قىزمەتتەردى ەلەكروندى ۇلگىگە اۋىستىرۋدىڭ ارقاسىندا قانشا قاراجاتتىڭ ۇنەمدەلگەنى ءالى بەلگىسىز.

«قازىرگى كەزدە ءبىز باعدارلامانى ازىرلەپ جاتىرمىز. ءبىراق ونىڭ ەكونوميكالىق تيىمدىلىگىنە قاتىستى ەسەپ- قيساپتى ءسال كەيىنىرەك جاريالايتىن بولامىز. شىنىمدى ايتسام، ءدال قازىر شامامەن قانشا بولاتىنىن دا ايتا المايمىن. دەگەنمەن، ول جۇيە ءتيىمدى، اشىق ءارى ۇنەمدى بولاتىنىن نىق سەنىممەن ايتۋعا بولادى»، - دەدى «زەردە» حولدينگى» ا ق باسقارما ءتوراعاسى اسەل جيەنبايەۆا «قازاقپارات» تىلشىسىنە بەرگەن سۇحباتىندا.

ونىڭ ايتۋىنشا، بۇگىندە «سيفرلىق قازاقستان - 2020» مەملەكەتتىك باعدارلاماسىنىڭ جوباسىن ازىرلەۋ جۇمىستارى اياقتالۋعا جاقىن. بۇدان بولەك، بەس مينيسترلىكتە سيفرلىق كەڭسەلەر اشىلىپ، مەملەكەتتىك قىزمەتتەردى ەلەكتروندى فورماتقا اۋىستىرۋ ماسەلەسى زەردەلەنۋدە.

قازىردىڭ وزىندە «ازاماتتارعا ارنالعان ۇكىمەت» مەملەكەتتىك كورپوراتسياسى اياسىندا 530 مەملەكەتتىك قىزمەت ەلەكتروندى فورماتقا اۋىستىرىلدى. اتالعان قىزمەتتەردى موبيلدى قوسىمشاعا كوشىرۋ شارالارى دا اتقارىلىپ كەلەدى.

ارمان اسقاروۆ