سەرپىن باعدارلاماسى اياسىندا وتباسى قۇرعاندار بار ما

استانا. قازاقپارات - بۇگىن "نۇر وتان" پارتياسىنىڭ باس كەڭسەسىندە جاستار اراسىنداعى جۇمىسسىزدىق ماسەلەسى ارنايى كوميسسيانىڭ وتىرىسىندا قارالدى.

جيىن بارىسىندا ءبىلىم بەرۋ ۇيىمدارىنىڭ "Serpin" ۇلتتىق قاۋىمداستىعىنىڭ ءتوراعاسى مۇرات ابەنوۆ "سەرپىن - 2050" باعدارلاماسى اياسىندا وتاۋ قۇرعان جاستار جايىندا ايتىپ بەردى.

ايتا كەتكەن ءجون، اتالعان باعدارلاما اياسىندا وڭتۇستىك وڭىرلەرىنىڭ جاستارىن سولتۇستىك ايماقتاردا كوپتەپ شوعىرلاندىرۋ شارالارى قاراستىرىلعان. ول ءۇشىن ءبىلىم جانە عىلىم مينيسترلىگى جىل سايىن مىڭداعان ءبىلىم بەرۋ گرانتتارىن ءبولىپ وتىرادى، دەپ حابارلايدى قازاقپارات ءتىلشىسى.

«ءبىز مىنا ءبىر ماسەلەنى بايقادىق، باعدارلاما اياسىندا وڭتۇستىكتەن سولتۇستىككە بارىپ، وقۋعا تۇسكەن جاستار 1-2 كۋرستان وتسە بولدى، ارى قاراي بەيىمدەلىپ كەتە بەرەدى. العاشقىدا سان الۋان كيكىلجىڭدەر بولادى. ول راس. دەگەنمەن، ءبىرىنشى- ەكىنشى كۋرستان كەيىن ولار تولىعىمەن سولتۇستىككە بەيىمدەلىپ جاتادى»، - دەيدى م. ابەنوۆ.

وسى كەزدە كوميسسيا ءتوراعاسى باقتيار ماكەن: «ولاردىڭ اراسىنلا وتباسى قۇرعاندار دا بار شىعار؟»، - دەپ سۇرادى.

«ءيا، قازىرگى كەزدە «سەرپىن» باعدارلاماسىمەن وقۋعا بارعاندار 8 وتباسىن قۇردى. 3 نەمەرەمىز بار»، - دەيدى م. ابەنوۆ. «ءبىر بالانىڭ اتىن سەرپىن دەپ قويۋ قاجەت»، - دەپ باستاعان ءتوراعاعا م. ابەنوۆ: «ونىسىن بىلمەدىم. ءبىراق ءبىر مۇرات بار»، - دەدى.

  

ارمان اسقاروۆ