قورعاس - شىعىس قاقپاسى ارنايى ەكونوميكالىق ايماعىندا ينفراقۇرىلىم دامىپ كەلەدى

استانا. قازاقپارات- ءماجىلىس دەپۋتاتتارى الماتى وبلىسىنا باردى. وندا حالىق قالاۋلىلارى ەلباسىنىڭ «نۇرلى جول -  بولاشاققا باستار جول» اتتى باعدارلاماسىنىڭ ىسكە اسۋ بارىسىمەن تانىسادى.

 سول ءۇشىن ارنايى كوشپەلى وتىرىس تا ءوتتى. وندا ماجىلىسمەندەر «قورعاس -  شىعىس قاقپاسى» ارنايى ەكونوميكالىق ايماعىن دامىتۋ ىسىمەن تانىسىپ، «باتىس ەۋروپا- باتىس قىتاي» حالىقارالىق كولىك ءدالىزىن سالعان سوڭ ايماق ينفراقۇرىلىمىنداعى وڭ وزگەرىستى بايقادى.

 ءماجىلىس دەپۋتاتتارى الدىمەن «باتىس ەۋروپا- باتىس قىتاي» حالىقارالىق اۆتودالىزىنە كىرەتىن «جەتىگەن- قورعاس» جولىنىڭ قۇرىلىسىمەن تانىستى. 304 شاقىرىمدىق جول قۇرىلىسىندا 4 مىڭعا جۋىق ادام ەڭبەك ەتەدى. جوسپارعا ساي جول بيىل تاپسىرىلۋى قاجەت. ماماندار ۋاقىتىنان ازداپ كەشىگىپ ءجۇرمىز، كەيبىر ايماقتاردا كوپىر قۇرىلىستارى اياقتالماي جاتىر. الايدا جىل سوڭىنا دەيىن بارلىق كەمشىلىكتەردى جويىپ، ۋاقىتىندا تاپسىرامىز دەپ وتىر.

بەرىك قاماليەۆ، ق ر ينۆەستيتسيالار جانە دامۋ ءمينيسترىنىڭ ورىنباسارى:

 - 2020 -جىلعا دەيىن ءبىز جەتى مىڭ شاقىرىم جولدى اقىلى ىستەۋىمىز كەرەك. كەلەسى جىلدان باستاپ الماتى- قورعاس، تاشكەنت- شىمكەنت،  قىزىلوردا- شىمكەنت ۋچاسكەلەرىن دە كىرگىزەمىز. ۇكىمەتتەن بەرىلگەن ۇلكەن اقشالاردى قايتارۋ ءۇشىن بىزگە وسىنداي تولەماقانى ەنگىزۋ كەرەك.

 «قورعاس» ارنايى ەكونوميكالىق ايماعىندا ينفراقۇرىلىم دامىپ كەلەدى. مۇندا 18 مىڭ كونتەينەرگە ارنالعان قۇرعاق پورت سالىنعان. لوگيستيكالىق ورتالىقتا ازىرگە 60 ادام ەڭبەك ەتەدى. ال «نۇركەنت» قالاشىعىندا قازىرگى كەزدە 10 مىڭعا جۋىق ادام تۇرادى. مۇندا مەكتەپ پەن ەمحانا، بالاباقشا بار. ءوڭىردىڭ وركەندەۋىنە تەمىرجولدىڭ ىقپالى زور. قازاقستان مەن كورشى ەلدەر اراسىنداعى تاۋار اينالىمىنىڭ نەگىزگى ۇلەسى تەمىرجول ارقىلى وتەدى.

 ەركىن جۋسانبايەۆ، «قازاقستان تەمىر جولى» ۇ ق ا ق باسقارما باسشىسىنىڭ ورىنباسارى:

 - ءبىز 2020 -جىلعا دەيىن قىتاي- ەۋروپا باعىتىنداعى جۇك اينالىمى جىلىنا 800 كونتەينەردى قۇرايدى دەپ ويلايمىز. سونىمەن قاتار يران مەن تۇركيا باعىتتارىنداعى جۇك اينالىم دا ۇلعايدى. كەزدەسۋ بارىسىندا دەپۋتاتتار ەلىمىزدىڭ كولىك- لوگيستيكا كەشەنىن جانە كاسىپكەرلىكتى ودان ءارى دامىتۋ، سونداي- اق قازاقستان رەسپۋبليكاسىنىڭ زاڭنامالىق بازاسىن جەتىلدىرۋ جونىندەگى بىرلەسكەن جۇمىستى جالعاستىرۋ ماسەلەلەرىن تالقىلادى.

 نۇرتاي ءسابيليانوۆ، ق ر پارلامەنتى ءماجىلىسىنىڭ دەپۋتاتى:

- «باتىس ەۋروپا- باتىس قىتاي» جولى، «قورعاس -  شىعىس قاقپاسى ارناي ەكونوميكالىق ايماعى» وسىلاردىڭ بارلىعى ءبىزدىڭ جالپى ەكونوميكامىزدى نىعايتۋعا ءارى قاراي دا كوتەرۋگە ءوز ۇلەسىن قوسادى دەپ ويلايمىز.

سونداي اق جۇمىس بارىسىندا دەپۋتاتتار جاركەنتتەگى ءبىرقاتار نىسانداردى ارالاپ، جۇگەرى وڭدەيتىن كراحمال- سىرنە زاۋىتىمەن جانە قورعاس وزەنىندە سالىنعان جاساندى سۋ قويماسىمەن تانىستى.

www.24.kz