انكارادا تۇركى مەملەكەتتەرىنىڭ تاۋەلسىزدىكتەرىنە ارنالعان حالىقارالىق جيىن ءوتىپ جاتىر
بۇل تۋرالى TWESCO سايتى حابارلادى.
القالى جيىننىڭ اشىلۋ سالتاناتىنا تاۋەلسىز تۇركى مەملەكەتتەرىنىڭ تۇركياداعى ەلشىلەرى مەن تۇركى ىنتىماقتاستىق ۇيىمدارىنىڭ باسشىلارى، ديپلوماتتار، كورنەكتى عالىمدار جانە زيالى قاۋىم وكىلدەرى قاتىستى.
ەكى كۇنگە سوزىلاتىن سيمپوزيۋم 11 پلەنارلىق وتىرىستا وتەدى. قاتىسۋشىلار تاۋەلسىز تۇركى مەملەكەتتەرىنىڭ تۇركيامەن جانە الەمنىڭ وزگە مەملەكەتتەرىمەن ديپلوماتيالىق بايلانىسى، تاۋەلسىزدىكتىڭ شيرەك عاسىرىندا شىنايى دوستىقتىڭ ورناۋى، تۇركى رەسپۋبليكالارى اراسىنداعى كوپجاقتى ىنتىماقتاستىق پەن پارلامەنتارالىق ديپلوماتياداعى تاجىريبەسى تاقىرىپتارىندا پايىمدى پىكىرلەرىن ءبىلدىرىپ، ورتاق تاريحىمىز بەن مادەني ىنتىماقتاستىق ماسەلەلەرى بويىنشا پىكىر الماسادى دەپ جوسپارلانعان.
تۇركى ىنتىماقتاستىق ۇيىمدارى باسشىلارىنىڭ قاتىسۋىمەن وتكەن Ⅱ پانەلدى وتىرىستا تۇركى اكادەمياسى حالىقارالىق ۇيىمىنىڭ (TWESCO) باسشىسى دارحان قىدىرالىنىڭ سالەمى مەن قۇتتىقتاۋىن حالىقارالىق بايلانىس جانە پروتوكول ءبولىمىنىڭ جەتەكشىسى اسحات كەسىكبايەۆ جەتكىزدى.
ايتا كەتۋ كەرەك، تۇركى كەڭەسى، TWESCO، تۇركپا، TURKSOY، TIKA، اتاتۇرىك اتىنداعى مادەنيەت، ءتىل جانە تاريح جوعارى قۇرىلىمى، قازاقستان رەسپۋبليكاسىنىڭ تۇركياداعى ەلشىلىگى مەن تۇرىك تاريح قۇرىلىمىنىڭ قولداۋىمەن وتەتىن ايتۋلى شارانىڭ ۇيىمداستىرۋشىلارى - قوجا احمەت ياساۋي اتىنداعى حالىقارالىق قازاق- تۇرىك ۋنيۆەرسيتەتى مەن انكارا ساياساتتانۋ جانە ەكونوميكالىق زەرتتەۋلەر ورتالىعى (ASEM).
