قازاقستاندا مەملەكەتتىك ارنالاردا جارنامانى شەكتەۋ ۇسىنىلدى
دەپ حابارلايدى «قازاقپارات» ءتىلشىسى.
ب ا ق باسشىلارى باس قوسقان جيىندا ك ت ك تەلەارناسىنىڭ باس ديرەكتورى قانات ساحيريانوۆ مەملەكەتتىك ارنالارعا جارنامانى بەرۋدى ازايتۋ ماسەلەسىن كوتەردى.
«شەتەلدىك بۇقارالىق اقپارات قۇرالدارىنا جارناما بەرۋگە تىيىم سالۋ تۋرالى بىلتىر كوتەرىلگەن زاڭنامالىق باستامانى ەسكە سالا كەتەيىك. بۇل نە ءۇشىن جاسالدى؟ سەبەبى، شەتەلدىك تەلەارنالار ءبىزدىڭ مەديا سالامىزعا ءبىر سەنت نەمەسە ءبىر رۋبل سالماستان، ءبىزدىڭ نارىقتان قوماقتى قارجى الىپ وتىردى. ەندى جارناماعا قاتىستى مەملەكەتتىك جانە جەكە تەلەارنالار ماسەلەسىن قاراۋ قاجەت. مەملەكەتتىك ارنالار مەملەكەت بيۋدجەتىنەن قارجىلاندىرىلادى. مەملەكەت بيۋدجەتى دەگەن ول - ءسىز بەن ءبىزدىڭ سالىعىمىز»، - دەدى ك ت ك تەلەارناسىنىڭ باس ديرەكتورى قانات ساحيريانوۆ.
ول مەملەكەتتىك ارنالار دا جەكە تەلەارنالار تولەگەن سالىق ەسەبىنەن قارجى الىپ وتىرعانىن تىلگە تيەك ەتتى.
«ءبىزدىڭ ارىپتەستەرىمىز بىرىنشىدەن، ءبىزدىڭ سالىق ەسەبىنەن قارجىلاندىرىلادى. ەكىنشىدەن، ولار ساپالى كونتەنتى ارقىلى جارناما نارىعىنىڭ جارتى بولىگىن بۇرىپ الادى. ال، جارناما - ءبىزدىڭ جالعىز تابىس كوزىمىز»، - دەدى ق. ساحيريانوۆ.
ءسوز كەزەگىن العان «حابار» اگەنتتىگىنىڭ باسقارما ءتوراعاسىنىڭ ورىنباسارى رينات كەرتايەۆ مەملەكەتتەن بولىنەتىن 36 ميلليارد تەڭگە 7 مەملەكەتتىك ارنا مەن 13 ايماقتىق ارنالاردى جانە رەسپۋبليكالىق راديو ستانسالاردى قارجىلاندىرۋعا كەتەتىنىن جەتكىزدى.
«جارناماعا قاتىستى ايتاتىن بولساق، مەملەكەتتىك ارنالاردا جارنامانى ازايتۋ دەگەن ماسەلەگە مەن قوسىلا المايمىن. سەبەبى، جارنامادان تۇسەتىن قارجىنى ءبىز جاڭا تەحنيكالار مەن ونى جاڭارتۋ، جوندەۋ جۇمىستارىنا جۇمسايمىز. مەملەكەت ارنالارعا تەحنيكا ساتىپ الۋعا، تەحنيكالىق قاجەتتىلىكتەرىنە قاراجات بولمەيتىنىن ەسكەرىڭىزدەر»، - دەدى رينات كەرتايەۆ.
سونىمەن قاتار، 31 - ارنانىڭ باس ديرەكتورى باعدات قوجاحمەتوۆ مەملەكەتتىك ارنالارعا جارنامانى شەكتەۋمەن قاتار، ولار تاراپىنان شەتەلدىك كونتەنتتى ساتىپ الۋعا تىيىم سالۋ قاجەتتىگىن دە ءسوز ەتتى.
اۆتور: الماس مۇقاش ۇلى
