باس پروكۋرور بيزنەسكە قىسىم كورسەتىپ وتىرعان ورگانداردى سىنادى
دەپ حابارلايدى قازاقپارات.
باس پروكۋراتۋرانىڭ دەرەكتەرى بويىنشا، قازىرگى ۋاقىتتا سالىق ورگاندارىنىڭ تاۋەكەلدى كاسىپورىندار، كۇماندى وپەراتسيالار تۋرالى حابارلامالارى قىلمىستىق ىسكە اينالۋدا. ەكونوميكالىق قىلمىستار تۋرالى 10 بەلگىنىڭ 7 ۋىن قۇزىرلى ورگانداردىڭ وزدەرى بەرگەن. ناتيجەسىندە مۇنداي حابارلامالار ەكى ەسەگە وسكەن. سايكەسىنشە، سالىقتىق تەكسەرۋلەر دە ەكى ەسە ارتقان. دەگەنمەن، ءاربىر ەكىنشى قىلمىستىق ءىس توقتاتىلعان. ولار قۇزىرلى ورگاننىڭ اكتىسى بولماعاندىقتان توقتاتىلىپتى.
«9 مىڭ ءىس قوزعالىپ، ول بويىنشا قىلمىستىق پروتسەسس باستالعان. تەرگەۋ، شەكتەۋ شارالارى، شوتقا توقتام سالۋ - قۇقىق قورعاۋ ورگاندارىنىڭ جۇمىس فورماتى مۇلدەم باسقا. سالىق ورگاندارى - قاداعالاۋ ورگاندارى ەمەس. بۇل پروتسەستى قۇقىق قورعاۋ ورگاندارى جۇرگىزەدى. سول قىلمىستىق ىستەردىڭ جارتىسىنان استامى توقتاتىلعان. وسىنداي قىلمىستىق قۋدالاۋدىڭ باستاماشىلارى مەملەكەتتىك كىرىستەر كوميتەتىنىڭ ەكى ورگانى، ءبىر- بىرىمەن حات الماسىپ، كىمگە قىلمىستىق ءىس قوزعاعىسى كەلدى، سوعان قوزعايدى. بۇنداي بىلىق، كەز كەلگەن مەملەكەتتە بارلىق ەكونوميكالىق تەرگەۋ ورگاندارىنىڭ باسشىلىعىن جۇمىستان شىعارۋعا جەتەر ەدى. وسى ارەكەتتەردى دەر ۋاقىتىندا بايقاپ، توسقاۋىل بولماعان پروكۋرورلار دا بار»، - دەدى ج. اسانوۆ ق ر باس پروكۋراتۋرانىڭ القا ماجىلىسىندە.
باس پروكۋروردىڭ ورىنباسارى مارات احمەتجانوۆتىڭ سوزىنشە، قىلمىستىق قۋدالاۋعا ۇشىراعان، الايدا، قىلمىس قۇرامى بولماعاندىقتان كەيىن توقتاتىلعان ىستەردىڭ تەرگەۋ حرونومەتراجى جاسالعان. ول ورتاشا ەسەپپەن 90 كۇنگە جالعاسقان.
«بيزنەسمەندەرگە وسى ءۇش ايدىڭ ىشىندە قۇقىق قورعاۋشىلاردىڭ بارلىق قۋدالاۋ ارسەنالى قولدانىلادى: ءتىنتۋ، جاۋاپ الۋ، شوتقا توقتام سالۋ. مۇنداي قىسىمعا شىدايتىندار از. مىسالى، مەملەكەتتىك كىرىستەر كوميتەتىنىڭ بەلگىسى بويىنشا، 5,5 ميلليون تەڭگەگە وپەراتسيا جاسالعانى ءۇشىن شىمكەنتتە «ينتەرن فتور شىمكەنت» كومپانياسىنىڭ قىزمەتى نەگىزسىز ءۇش ايعا توقتاتىلعان. ونى نەگىزسىز جالعان كاسىپكەرلىك بويىنشا قىلمىستىق ءىس قوزعالعان. ەسەپشوتىنا توقتام سالىپ، قۇجاتتارىن الىپ قويعان، كەلىسىمشارتتار جاساۋعا تىيىم سالعان، سالىقتىق تەكسەرىس تاعايىنداعان. ءوز كەزەگىندە ول تەكسەرىس ەشقانداي زاڭ بۇزۋ ارەكەتىن انىقتاماعان. وسى ۋاقىت ارالىعىندا بۇل فيرما ءوزىنىڭ ىسكەرلىك بەدەلىن جوعالتتى، جەتكىزۋشىلەر سىرت اينالعان، فيرما قازىرگى ۋاقىتتا بانكروتتىققا ۇشىرادى، جۇمىس ورىندارى جابىلدى» ، - دەيدى احمەتجانوۆ.
ونىڭ سوزىنشە، ءاربىر التىنشى قىلمىس قانا راستالعان.
«ەكونوميكالىق تەرگەۋ ورگاندارىنا ايتامىن، سىزدەر پرەزيدەنت سالىپ جاتقان ەكونوميكالىق ساياساتقا توسقاۋىل بولىپ جاتىرسىزدار. كوردىڭىزدەر مە، قانداي سۇمدىق! سىزدەردى بيزنەسكە جىبەرىپ، وزدەرىڭدى جۇمىس ىستەتۋ كەرەك»، - دەدى باس پروكۋرور ج. اسانوۆ.
