كۇيەۋى ورتەمەك بولعان ايەل بالالارىن قايتارا الماي ءجۇر

الماتى. قازاقپارات - ەكى جاسار ۇلىنىڭ كوز الدىندا ءوز ايەلى اقەركە بايعازيەۆانى ورتەگەن ەر ادام بالالارىن جۇبايىنا بەرمەي ءجۇر.

ەسكە سالايىق، كەشە الماتى قالالىق سوتى مامانداندىرىلعان اۋدانارالىق سوتىنىڭ شەشىمىن بۇزىپ، بالالاردى اناسىمەن قالدىرۋعا ۇكىم شىعارعان ەدى.

قازاقپارات تىلشىسىنە اقەركە بايعازيەۆانىڭ ايتۋىنشا، اپەللياتسيالىق سوت وتىرىسى كەشە 4 -قازان كۇنى بولدى.

«ءبىز بالالارعا اناسىنان ارتىق ەشكىم قاراي المايتىندىعىن جازىپ، اپەللياتسيالىق ارىز-شاعىم بەردىك. سۋديالار بولعان وقيعا تۋرالى سۇراقتار قويدى، قامقورلىق ورگاندارى دا بالالاردى اناسىنا بەرۋ كەرەك دەگەن پىكىر ايتتى. باقىتىمىزعا وراي، سوت بالالاردى ءبولىپ، ۇلكەن بالالاردى اكەسىنە بەرۋ كەرەكتىگى تۋرالى مامانداندىرىلعان اۋدانارالىق سوتتىڭ شەشىمىن بۇزدى. سوت بالالاردى اناسىمەن، ياعني مەنىمەن تۇرسىن دەپ ۇكىم شىعاردى. مەن بالالاردىڭ اكەسىمەن ارالاسۋىنا قارسى بولمايمىن، تەك مەنىمەن تۇرسا بولدى»، - دەدى ا. بايعازيەۆا.

الايدا، اقەركەنىڭ ايتۋىنشا، جۇبايى بالالاردى قايتارعىسى كەلمەيدى.

بۇعان دەيىن حابارلانعانداي، وقيعا 2015 -جىلى 24 -جەلتوقساندا بولدى. ەر ادام ەكى جاسار ۇلىنىڭ كوزىنشە ايەلىنە بەنزين قۇيىپ، ونى ورتەپ جىبەرگەن. اقەركە 1-, -2 جانە 3-دارەجەلى كۇيىك جاراقاتتارىن الدى. فاكتى بويىنشا ايەل پوليتسياعا ارىز جازدى، ءبىراق قىلمىس قۇرامىنىڭ بولماۋىنان ءىس توقتاتىلدى. جاقىندا ءىس قايتا قوزعالدى. الماتىداعى كامەلەتكە تولماعاندار ىستەرى جونىندەگى مامانداندىرىلعان اۋدانارالىق سوتى ەكى بالانى اكەسىمەن قالدىرۋ تۋرالى شەشىم قابىلدادى. اناسىمەن كىشى - ءتورت جاسار ۇل قالدى.