ءبىلىم مينيسترلىگى جوعارى وقۋ ورىندارىنا ەمتيحان تاپسىرماي ءتۇسۋ مۇمكىندىگىن قاراستىرادى
بۇل تۋرالى ۆەدومستۆونىڭ باسپا ءسوز قىزمەتىنەن مالىمدەدى.
ەسكە سالساق، 4 -قازان كۇنى ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ق ر جوعارى وقۋ ورىندارى قاۋىمداستىعىنىڭ پرەزيدەنتى راحمان الشانوۆ ج و و- نىڭ پروفەسسورلىق- وقىتۋشىلىق قۇرامىنىڭ ارا- سالماعىن قايتا قاراۋ سونداي-اق، جوعارى ءبىلىمنىڭ قولجەتىمدىلىگىن كەڭەيتۋگە بايلانىستى ءبىرقاتار ۇسىنىس جاساعان بولاتىن.
اتاپ ايتقاندا، ءبىلىم بەرۋ جانە عىلىمي جۇمىستارعا ماگيسترلەر مەن ءوندىرىس ماماندارىن تارتۋ جانە ولاردىڭ پروفەسسورلىق- وقىتۋشىلىق قۇرامداعى ۇلەسىن %70 دەيىنە جەتكىزۋ مۇمكىندىگىن قاراستىرۋ؛ ماگيسترلەر مەن PhD دوكتورلارىن دايىنداۋعا مەملەكەتتىك تاپسىرىستى ۇلعايتۋ؛ ج و و- نىڭ اقىلى بولىمدەرىنە تۇسۋگە نيەتتى تالاپكەرلەردى ۇ ب ت تاپسىرۋسىز، تەك وقۋ ورىندارىنىڭ ۇيىمداستىرعان ەمتيحاندارىن تاپسىرۋ ارقىلى ءتۇسۋ مۇمكىندىكتەرىن قاراستىرۋ.
«ق ر ءبىلىم جانە عىلىم مينيسترلىگى قازاقستان جوعارى وقۋ ورىندارى قاۋىمداستىعىنىڭ ۇسىنىستارىن جۇمىس بارىسىنا قابىلداپ، ولاردىڭ ناتيجەلەرىن حابارلايتىن بولادى»، - دەلىنگەن مينيسترلىكتىڭ تاراتقان حابارلاماسىندا.
