لاڭكەستىككە ىقپال ەتەتىن ءدىني توپتار مەن بىرلەستىكتەردىڭ قىزمەتىنە تىيىم سالىنادى
دەپ حابارلايدى قازاقپارات.
«سىزدەردىڭ تالقىلاۋلارىڭىزعا ەنگىزىلىپ وتىرعان زاڭ جوباسى قاۋىپسىزدىك كەڭەسى وتىرىسىندا مەملەكەت باسشىسىنىڭ تاپسىرماسى بويىنشا ازىرلەندى. جوبانى دايارلاۋ كەزىندە سوڭعى كەزدەرى ەلىمىزدە جانە الەمدە ورىن العان لاڭكەستىك قىلمىستار، سونداي- اق بۇل قىلمىستارمەن كۇرەس بويىنشا وڭتايلى تاجىريبە ەسكەرىلدى»، - دەدى ق ر ۇلتتىق قاۋىپسىزدىك كوميتەتى ءتوراعاسىنىڭ ورىنباسارى مارات قالقابايەۆ زاڭ جوباسىن دەپۋتاتتارعا تانىستىرۋ بارىسىندا.
ونىڭ سوزىنە قاراعاندا، اقتوبە مەن الماتىداعى سوڭعى وقيعالار ەكسترەميزم جانە تەرروريزمگە قارسى ءىس- قيمىل سالاسىندا زاڭناماعا وزگەرىستەر ەنگىزۋگە قاجەتتى ينديكاتور بولدى.
زاڭ جوباسىن قابىلداۋداعى ماقسات - ەكسترەميزمگە جانە تەرروريزمگە قارسى ءىس- قيمىل، قارۋ- جاراق اينالىمى جانە كوشى- قوندى رەتتەۋ سالاسىنداعى قولدانىستاعى زاڭنامانى جەتىلدىرۋگە نەگىزدەلگەن.
وندا قارۋ- جاراق اينالىمىن، ونى ساقتاۋ ءتارتىبىن باقىلاۋدى كۇشەيتۋ، ونىڭ ىشىندە ازاماتتىق، قىزمەتتىك قارۋ جانە وق- ءدارى اينالىمى، سونداي- اق كۇزەت قىزمەتىن جۇزەگە اسىرۋ سالاسىندا جۇمىس ىستەيتىن كاسىپكەرلىك سۋبەكتىلەرىن مەملەكەتتىك باقىلاۋدىڭ ەرەكشە ءتارتىبىن جۇزەگە اسىرۋ ەسكەرىلگەن.
بۇدان بولەك، ەكسترەميزم مەن تەرروريزم ءۇشىن، ونىڭ ىشىندە حالىقارالىق لاڭكەستىك ۇيىمدارعا جانە شەتەلدىك قارۋلى جانجالدارعا قاتىسقانى ءۇشىن جازاعا تارتۋ شارالارىن كۇشەيتۋ، لاڭكەستىككە ىقپال ەتەتىن ءدىني توپتار مەن بىرلەستىكتەردىڭ قىزمەتىنە تىيىم سالۋ قامتىلىپ وتىر.
سونىمەن قاتار تەرروريزمگە قارسى ءىس- قيمىل تۋرالى زاڭنامانى ساقتاماعانى ءۇشىن، سونداي- اق قولدانىلۋى مىندەتتى تەحنيكالىق قۇرالداردىڭ جارامسىزدىعى ءۇشىن كۇزەت قۇرىلىمدارىنىڭ جانە لاڭكەستىك جاعىنان وسال نىساندار يەلەرىنىڭ اكىمشىلىك جاۋاپكەرشىلىگىن ەنگىزۋ كوزدەلىپ وتىر.
اۆتور: رۋسلان عابباسوۆ
