باقىتجان ساعىنتايەۆ قارجىنى يگەرە الماي وتىرعان اكىمدەردى سىنعا الدى

استانا. قازاقپارات - ق ر پرەمەر- ءمينيسترى باقىتجان ساعىنتايەۆ ۇكىمەت وتىرىسىندا مەملەكەتتىك قارجىنى يگەرە الماي وتىرعان ءبىرقاتار وبلىس اكىمدەرىنەن جاۋاپ الدى.

ەڭ الدىمەن، ۇكىمەت باسشىسى قوستاناي وبلىسىنىڭ اكىمى ارحيمەد مۇحامبەتوۆتەن «نۇرلى جول» باعدارلاماسىنا قاتىستى ەسەبىن تىڭدادى.

باياندامادان سوڭ ب. ساعىنتايەۆ قاراجات يگەرۋدە پروبلەما بارىن ەسكە سالدى.

«تۇرعىن ءۇي كوممۋنالدىق شارۋاشىلىق بويىنشا 4 ميللياردتان استام تەڭگە بولىنگەن دەپ ايتتىڭىز. ءبىراق، مەندە بار اقپاراتتار بويىنشا، بۇل قاراجاتتى يگەرۋ تەك 19 پايىزعا جۇزەگە اسىرىلعان. قىس بولسا جاقىنداپ كەلەدى. وسى جونىندە نە ايتاسىز؟»، - دەدى ۇكىمەت باسشىسى.

ءوز كەزەگىندە ا. مۇحامبەتوۆ، بۇل نىسانداردىڭ جىلىتۋ ماۋسىمىنا ەشقانداي قاتىسى جوقتىعىن ايتىپ اقتالدى.

«وبلىس بويىنشا جىلىتۋ نىساندارىنىڭ بارلىعى دايىن. سالىنىپ جاتقان نىساندار قوسىمشا قۋاتتى ارتتىرۋعا ارنالعان، سوندىقتان ەشقانداي پروبلەما بولمايدى»، - دەپ سەندىردى ءوڭىر باسشىسى.

«قىسقى ماۋسىمعا ۇلگەرەسىز بە، جوق پا - ماسەلە وندا ەمەس. كورسەتىلەتىن قىزمەت ساپاسىن جاقسارتۋ كەرەك. ال، ءسىز بولساڭىز يگەرىلمەگەن اقشا جىلىتۋ ماۋسىمىنا ەش اسەر ەتپەيدى دەيسىز. اقشا ءبولىندى مە، يگەرۋ كەرەك»، - دەدى ب. ساعىنتايەۆ.

سونىمەن قاتار، ۇكىمەت باسشىسى الماتى وبلىسىندا دا قاراجات يگەرۋ تومەن دەڭگەيدە، نەبارى 22 پايىز ەكەندىگىن ەسكەرتتى. بۇعان قاتىستى الماتى وبلىسىنىڭ اكىمى اماندىق باتالوۆ «نۇرلى جول» باعدارلاماسىنىڭ ءبىرقاتار باعىتتارى بويىنشا جۇرگىزىلىپ جاتقان جۇمىستار بويىنشا ەسەپ بەردى جانە قارجىنىڭ تولىق يگەرىلەتىنىن اتاپ ءوتتى.

«اتىراۋ وبلىسى، شاعىن جانە ورتا بيزنەستى دامىتۋعا كۇش سالۋ كەرەك. مۇنايلى ءوڭىر بولعان سوڭ تۇرعىنداردىڭ كوبى سول سالادا جۇمىس ىستەيدى. دەگەنمەن، دە ءبىز ەلباسى تاپسىرماسى بويىنشا، «بيزنەستىڭ جول كارتاسى-2020» اياسىندا قارجى بولۋدەمىز. ينفراقۇرىلىمداردى بيزنەسكە تارتۋ ءۇشىن. ءسىزدىڭ وبلىسقا 692 ميلليون تەڭگە بولىنگەن. وسى ۋاقىتقا دەيىن سىزدەر ونى العان جوقسىزدار. سىزدەردە نيەت جوق پا، الدە بيزنەستەردە قاجەتتىلىك جوق پا؟ ءتىپتى الىنبايدى دا، سۇرالمايدى دا. ول قاراجات ءالى كۇنگە دەيىن بىزدە جاتىر»، - دەدى باقىتجان ساعىنتايەۆ.

«باقىتجان ءابدىر ۇلى، 692 ميلليون تەڭگە بويىنشا، قازىرگى ۋاقىتتا كەلىسىمشارتتار بارلىعى جاسالعان. قاجەتتى ىستەر اتقارىلىپ جاتىر. جىلدىڭ اياعىنا دەيىن بۇنىڭ بارلىعىن تولىعىمەن يگەرەمىز»، - دەدى ءوز كەزەگىندە اتىراۋ وبلىسىنىڭ اكىمى نۇرلان نوعايەۆ.

الايدا، بۇل جاۋاپ پرەمەر- ءمينيستردىڭ كوڭىلىنە تولمادى.

«ول مەنىڭ ويىمشا جاي عانا ءسوز. ويتكەنى، قازان ايى باستالىپ كەتتى. ونى وزدەرىڭىزگە اۋدارىپ العانىڭىزشا، كاسىپكەرلەرگە بەرەمىز دەگەنىڭىزدەرشە، بايقاۋ وتكىزگەندەرىڭىزشە جىل بىتەدى. بيىلعى جىلى ءاربىر وبلىستان سۇرانىسى بار كاسىپورىندار، شاعىن جانە ورتا بيزنەس ول اقشانى پايدالانا الماي قالدى دەگەن ءسوز. جىلدىڭ سوڭىندا سىزدەن وسى ماسەلەنى سۇرايمىز»، - دەدى ۇكىمەت باسشىسى.

اۆتور: جاسۇلان جولدىبايەۆ