قازاقستان مەن رەسەي پرەزيدەنتتەرى «جيىرما سەگىز پانفيلوۆشى» فيلمىن تاماشالادى

استانا. قازاقپارات - كەشە رەسەي باسشىسىنىڭ قازاقستانعا جۇمىس ساپارى نۇرسۇلتان نازاربايەۆ پەن ۆلاديمير پۋتيننىڭ «جيىرما سەگىز پانفيلوۆشى» فيلمىن بىرلەسە تاماشالاۋىمەن اياقتالدى.

بۇل تۋرالى اقوردانىڭ باسپا ءسوز قىزمەتىنەن حابارلادى.

كينوتۋىندى ا. بەكتىڭ «ۆولوكولامسك تاس جولى» شىعارماسى نەگىزىندە تۇسىرىلگەن. ونىڭ وقيعالارى پانفيلوۆ ديۆيزياسى اتقىشتار باتالونىنىڭ كومانديرى باۋىرجان مومىش ۇلىنىڭ اتىنان اڭگىمەلەنەدى.

مەملەكەتتەر باسشىلارى الماتىدا قۇرىلعان، جاۋ تانكىلەرىنىڭ ماسكەۋگە باراتىن جولىن بوگەگەن ديۆيزيانىڭ ەرلىگى كەلەر ۇرپاق ەسىندە ءاردايىم قالۋعا ءتيىس ەكەنىن اتاپ ءوتتى.

رەسەيدىڭ مادەنيەت ءمينيسترى ۆ. مەدينسكي ەكى ەل باسشىلارىنا قازاق، ورىس، قىرعىز جانە ۋكراين جاۋىنگەرلەرىنەن قۇرالعان ديۆيزيانىڭ باتىرلىعى مەن قاھارماندىعى تۋرالى اڭگىمەلەدى.

- ەرلىك كورسەتكەن ديۆيزيانىڭ ەرەكشەلىگى ونىڭ قۇرامىندا ەكەندىگىن اتاپ ايتۋ كەرەك. ول كادرلىق اسكەريلەردەن ەمەس، اسكەرگە شاقىرىلعان قاراپايىم ازاماتتاردان جاساقتالدى، ولار سوعان دەيىن بۇكىل ەۋروپانى باسىپ وتكەن كاسىبي تانك قۇرامالارىن توقتاتا الدى، - دەدى ۆ. مەدينسكي.

فيلمدەگى وقيعا 1941 -جىلدىڭ كۇزىندە بولعان. جازباشا دەرەك بويىنشا 1941 -جىلدىڭ 16- قاراشاسىندا گەنەرال ي. ۆ. پانفيلوۆ قولباسشىلىق ەتكەن 316- اتقىشتار ديۆيزياسىنىڭ 28 ساربازى دۋبوسەكوۆو رازەزىن قورعاپ، ماسكەۋگە بەت العان نەمىستىڭ تانك باتالونىن توقتاتادى. سيۋجەت تولىعىمەن كەڭەس ساربازدارىنىڭ ەرلىگىنە ارنالعان.

قىسقى كورىنىستەر سانكت- پەتەربۋرگ پەن يۆانوۆو توڭىرەگىندە تۇسىرىلگەن. سوڭعى كادرلاردا الماتىداعى 28 گۆاردياشى- پانفيلوۆشىلار اتىنداعى ساياباق كورسەتىلەدى.