نۇرسۇلتان ابىشەۆ: تاۋەلسىزدىكتىڭ قۇرداسى بولۋ مەن ءۇشىن ۇلكەن باقىت
بۇل تۋرالى بۋراباي اۋدانىنا قاراستى مادەنيەت اۋىلىنداعى ورتا مەكتەپتىڭ دەنە شىنىقتىرۋ ءپانىنىڭ مۇعالىمى نۇرسۇلتان ابىشەۆ ءمالىم ەتتى.
ەل تاۋەلسىزدىگىنە بيىل 25 جىل تولىپ وتىر. شيرەك عاسىردا ەلىمىز اياعىنان نىق تۇرىپ، بۇكىل الەمگە تانىلا ءبىلدى. اسىرەسە، وسى ارالىقتا مەملەكەتتى قالىپتاستىرۋ جانە بارلىق سالانى دامۋ بويىنشا اۋقىمدى جۇمىستار جۇرگىزىلدى. بۇگىنگى ەكونوميكاسى قارىشتاپ دامىعان تاۋەلسىز قازاقستان سونىڭ ايقىن دالەلى. سول سەبەپتى، ق ر تۇڭعىش پرەزيدەنتىمىزدىڭ ەسىمى دە حالىق اراسىندا جىلى ايتىلىپ، ىستىق ىقىلاسقا، لايىقتى قۇرمەتكە بولەنىپ ءجۇر. اسىرەسە، 1991 -جىلدان بىلاي قاراي نۇرسۇلتان ەسىمدى ۇلدارىمىزدىڭ كوبەيۋى وسى سوزىمىزگە دالەل بولا الادى. اقمولا وبلىسىندا دا نۇرسۇلتانداردىڭ سانى از ەمەس. ءبىراق تا، سول تاۋەلسىزدىك جىلدارى دۇنيەگە كەلگەن نۇرسۇلتاندار ساناۋلى عانا. سونىڭ ءبىرى - 1991 -جىلدىڭ اقپانىندا بۋراباي اۋدانىنا قاراستى مادەنيەت اۋىلىندا دۇنيەگە كەلگەن نۇرسۇلتان ابىشەۆ دەر ەدىك.
ونىڭ ومىرگە كەلۋى دە ۇلكەن تاريحي وقيعا سانالادى. كەيىپكەرىمىزدىڭ اتاسى ءتىنالى سول جىلدارى ەل ومىرىندە ۇلكەن قۋانىش بولاتىنىن، بيلىك باسىنا قازاقتىڭ رۋحىن كوتەرەتىن، ەلىمىزدى الەمگە ايگىلەيتىن ازامات نۇرسۇلتان نازاربايەۆ كەلەتىنىن ىشتەي سەزىپ، نەمەرەسىنىڭ دە ەسىمىن سولاي اتايمىن دەپ شەشكەن ەكەن.
«ۇلكەننىڭ سوزىمەن كەلىسپەۋ - ادەپكە جات» دەپ تۇسىنگەن وتباسى اتاسىنىڭ بۇل پىكىرىن قوستاي جونەلىپتى. ءسويتىپ، 1991 -جىلدىڭ اقپانىندا قاراپايىم قازاق اۋىلىنداعى ۇلكەن شاڭىراقتا نۇرسۇلتان ەسىمدى ءسابي شىر ەتىپ دۇنيەگە كەلسە، ءدال سول جىلدىڭ جەلتوقسانىندا ەلىمىز اتا-بابالارىمىزدىڭ عاسىرلار بويى اڭساعان تاۋەلسىزدىگىنە قول جەتكىزدى. قازاقستان تاريحىندا العاش رەت وتكىزىلگەن جالپىحالىقتىق پرەزيدەنت سايلاۋىندا نۇرسۇلتان نازاربايەۆ سايلاۋشىلاردىڭ باسىم داۋىسىن جيناپ، قازاقستان رەسپۋبليكاسىنىڭ پرەزيدەنتى بولىپ سايلاندى. وسىلايشا، ءتىنالى قارتتىڭ شاڭىراعىنا ءبىر قۋانىشتان كەيىن كوپ ۇزاماي ەكىنشى قۋانىش تا كەلىپ جەتتى.
قازىرگى تاڭدا قاريانىڭ نەمەرەسى نۇرسۇلتان ءوسىپ-ءونىپ، تاربيەلى ازاماتقا اينالدى. 2011 جىلى شۋچە قالاسىنداعى پەداگوگيكالىق كوللەدجدى دەنە شىنىقتىرۋ ءپانىنىڭ مۇعالىمى ماماندىعى بويىنشا ويداعىداي ءتامامداپ، وسى كۇنى ءوزى تۋىپ- وسكەن مادەنيەت اۋىلىنداعى ەسماعامبەت ىسمايىلوۆ اتىنداعى ورتا مەكتەپتە تىنباي ەڭبەك ەتۋدە. ۇستازدىق نۇرسۇلتاننىڭ بويىنا قانمەن دارىعان ماماندىق دەسەك تە بولاتىن شىعار. سەبەبى، ونىڭ اتاسى ءتىنالى كەزىندە مەكتەپتە وقۋشىلارعا فيزيكا، ماتەماتيكا پاندەرىنەن ساباق بەرسە، اكەسى جانگەلدى كوپ جىل مەكتەپ ديرەكتورى بولعان كىسى. وكىنىشكە وراي، ەكەۋى دە ومىردەن ەرتە وزعانىمەن، ولاردىڭ ۇستازدىق جولىن ارتىندا قالعان تۇياعى جالعاپ كەلەدى. وسى كۇنى نۇرسۇلتاننىڭ اناسى ءۇمىتجان دا، قۇداي قوسقان جان- جارى گۇلنيسا دا مۇعالىم بولىپ قىزمەت ىستەيدى. بۇل مارتەبەلى ماماندىقتى ۇرپاقتان ۇرپاققا امانات ەتىپ، ومىرلەرىنە سەرىك ەتىپ جۇرگەن وتباسى ءۇشىن ۇلكەن باقىت.
«تاۋەلسىزدىكتىڭ قۇرداسى بولۋ مەن ءۇشىن ۇلكەن باقىت. تاۋەلسىز ەلىمىزدە كەلەشەك ۇرپاق ءۇشىن بارلىق جاعداي جاسالىنعان. حالىقتىڭ الەۋمەتتىك جاعدايىن جاسقارتۋ باعىتىندا قولعا الىنعان مەملەكەتتىك باعدارلامالار سونىڭ ايقىن دالەلى. سونداي «ديپلوممەن - اۋىلعا!» مەملەكەتتىك باعدارلاماسى قاتىسۋشىلارىنىڭ ءبىرى - مەنمىن. بالكىم، تۋعان اۋىلىما جۇمىسقا كەلگەندىكتەن وزگە زامانداستارىما قاراعاندا اۋىلدىڭ تىنىس- تىرشىلىگىنە ۇيرەنىپ كەتۋ ماعان جەڭىلدەۋ بولعان شىعار. دەسەك تە، اۋىلعا باعدارلاما ارقىلى بارىپ الىپ، كەيىن ودان كەتۋگە اسىعاتىن جاس مامانداردىڭ ءىسىن قۇپتامايمىن. اۋىلدا ەڭبەك ەتەمىن دەگەن شەشىمگە كەلگەننەن كەيىن ايتقان سوزگە بەرىك بولىپ، سول قىزمەتتى ابىرويمەن اتقارا ءبىلۋ قاجەت»، - دەيدى كەيىپكەرىمىز.
