ۇيقى باسقان اۋىلداردان كوشىرىلگەندەرگە جاڭا پاتەرلەر جەكەمەنشىككە بەرىلمەك

كوكشەتاۋ. قازاقپارات - كالاچي جانە كراسنوگورسك اۋىلدارىنان ەسىل قالاسىنا كوشىرىلگەن وتباسىلارعا جاڭا پاتەرلەرى جەكەمەنشىككە بەرىلەتىن بولدى.

بۇل تۋرالى وبلىستىق ىشكى ساياسات باسقارماسىنىڭ جانىنداعى وڭىرلىك كوممۋنيكاتسيالار قىزمەتىندە وتكەن باسپا ءسوز ماسليحاتى بارىسىندا ەسىل اۋدانىنىڭ اكىمى امانبەك قالجانوۆ ءمالىم ەتتى.

اكىمنىڭ ايتۋىنشا، وسى كۇنى «ۇيقى باسقان» ءارى الەۋەتى تومەن كالاچي جانە كراسنوگورسك ەلدى مەكەندەرىنىڭ تۇرعىندارىن قاۋىپسىز ايماقتارعا كوشىرۋ جۇمىستارى اياقتالىپ، قوس اۋىلدا 127 وتباسى قالعان.

«كالاچي مەن كراسنوگورسكىدەگى جاعداي بۇكىل ەلدى الاڭداتقانى بەلگىلى. مۇنداعى «ۇيقى اۋرۋى» العاش رەت تىركەلگەننەن بەرى كوپ ادام وسى دەرتكە شالدىعىپ، بىرنەشە زەرتتەۋلەر جۇرگىزىلدى. الايدا، ودان ەش ناتيجە بولمادى. سوندىقتان، وبلىس اكىمى سەرگەي كۋلاگيننىڭ تاپسىرماسىنا سايكەس، اتالعان اۋىل تۇرعىندارىن قاۋىپسىز ايماقتارعا كوشىرۋ باستالدى. ول ءۇشىن الدىمەن، بارلىق تۇرعىندارعا ءتۇسىندىرۋ جۇمىستارىن قولعا الدىق. وسى كۇنگە دەيىن 78 وتباسىن وبلىستىڭ ار اۋدانىنداعى اۋىل شارۋاشىلىعى قۇرىلىمدارىنىڭ باسشىلارى وزدەرىنە كوشىرىپ السا، جارقايىڭ اۋدانىنىڭ دەرجاۆينسك قالاسىنا 39 وتباسى، ەسىل اۋدانىنىڭ ورتالىعى ەسىل قالاسىنا 97 وتباسى (العاشىندا 43, كەيىن تاعى 54 وتباسى) قونىستاندىرىلدى. ال، كالاچي اۋىلىندا قالعان 108 وتباسى مەن كراسنوگورسك اۋىلىندا قالعان 9 وتباسىنا سوڭعى مەرزىم (بارلىعى 127 وتباسى) 1 -قىركۇيەككە دەيىن كوشۋلەرىنە ۋاقىت بەرىلدى.

 الايدا، اتالعان وتباسىلار ءتۇرلى سەبەپتەرمەن قونىس اۋدارۋدان باس تارتتى. ءبىز ارينە ەشكىمدى كۇشتەپ كوشىرە المايمىز. سوندىقتان كوشكىلەرى كەلمەيتىندەر اۋىلدارىندا قالا بەرەدى. ال، ولارعا ارنالعان ەسىلدەگى 20 پاتەر جانە دەرجاۆينسكىدەگى 36 پاتەر ەندى ءۇي كەزەگىندە تۇرعان جەتىم بالالارعا بەرىلەتىن بولادى. جالپى، وبلىس اكىمىنىڭ تاپسىرماسىنا سايكەس، اتالعان اۋىلداردان قونىس اۋدارىلعانداردىڭ بارلىعىنا جاقىندا پاتەرلەرى جەكەمەنشىككە بەرىلەتىن بولادى»، - دەپ اتاپ ءوتتى ا. قالجانوۆ.

اۋدان اكىمىنىڭ ايتۋىنشا، كوشۋدەن باس تارتقان كالاچي جانە كراسنوگورسك اۋىلدارىنىڭ تۇرعىندارىنا قالاي بولعاندا دا اكىمدىك تاراپىنان جاعداي جاسالىنا بەرمەك.

«قازىرگى كەزدە وسى ەكى اۋىلدا بارلىعى 23 بالا بار بولسا، ونىڭ 20 سى ەسىلدەگى مەكتەپ ينتەرناتىندا ءبىلىم الۋدا. ولار اۆتوبۋسپەن تەگىن تاسىمالدانادى. ال، قالعان 3 بالا اۋىلدا وقيدى. سول ءۇشىن اۋىلدا باستاۋىش مەكتەپتىڭ ۇستاپ وتىرمىز»، - دەدى ا. قالجانوۆ.

اۋدان اكىمىنىڭ سوزىنە قاراعاندا، وسى كۇنى مۇندا عالىمدار مەن «قازگيدرومەت» ماماندارى جۇمىس ىستەۋدە. ولار توپىراق، سۋ جانە اۋا سىنامالارىن الىپ، زەرتتەۋدە. ازىرگە ناتيجە جوق.

اۆتور: اسلان وسپانوۆ