بيلەت قۇنىنا قاتىستى «ەير استانا» تۇسىنىكتەمە بەردى
«اۋە كومپانياسىنىڭ نەگىزگى شىعىندارى ا ق ش دوللارىمەن ەسەپتەلەدى. بۇعان ۇشاقتى ساتىپ الۋ نەمەسە جالعا الۋ شارتتارى، قوسىمشا بولشەكتەردى ساتىپ الۋ، اۆياتسيالىق جانار- جاعارماي، ساقتاندىرۋ، تەحنيكالىق قىزمەت كورسەتۋ جانە باسقا دا شىعىندار جاتادى. ۇلتتىق ۆاليۋتانىڭ بىلتىرعى دەۆالۆاتسياسى كومپانيا شىعىندارىن ەسەلەتە ءتۇستى. قازاقستان بويىنشا ۇشىرىلىمدار ۇلتتىق ۆاليۋتادا تولەنەدى، سوندىقتان تەڭگەلىك تاريفتەردىڭ شەكتى دەڭگەيىنىڭ وزگەرۋى امالسىز ورىن الدى. ونىڭ ۇستىنە، دەۆالۆاتسياعا قاراماستان، «ەير استانا» ىشكى رەيستەردەگى نەگىزگى ساتىلىم جاسايتىن وزگە تاريفتەردىڭ قۇنىن وزگەرتكەن جوق، ونىڭ ىشىندە بيلەتتى الدىن الا ساتۋ تاريفتەرى، زەينەتكەرلەر مەن جاستارعا ارنالعان تاريفتەر سول قالپىندا قالدى»، - دەپ اتاپ كورسەتىلگەن كومپانيانىڭ باسپا ءسوز حابارلاماسىندا.
سونداي-اق ۇلى وتان سوعىسىنىڭ ارداگەرلەرى مەن تىل ەڭبەككەرلەرىن تەگىن تاسىمالداۋ ساياساتى دا قالدى.
«ىشكى رەيستەردىڭ ورتاشا ءتاريفى بيىل ءبىرىنشى جارتىجىلدىقتا وتكەن جىلمەن سالىستىرعاندا، 22 پايىزعا قىمباتتادى. بۇل دەۆالۆاتسيا كولەمىنەن الدەقايدا تومەن، سوندىقتان كومپانيا 2016 -جىلدىڭ ءبىرىنشى جارتىجىلدىعىندا 6,6 ميلليون ا ق ش دوللارى شاماسىندا شىعىن كوردى»، - دەپ جازادى «Air Astana».
بۇدان بۇرىن حابارلانعانىنداي، 2016 -جىلى قازاقستاندا اۋە بيلەتتەرى 40 پايىزعا قىمباتتاعان. قازىرگى ۋاقىتتا اتالمىش فاكتىگە بايلانىستى جايتتارمەن مونوپولياعا قارسى كۇرەس ورگاندارى اينالىسۋدا.
اۆتور: جاسۇلان جولدىبايەۆ
