قابىردى كورگەندە بەت سيپاۋ دۇرىس پا؟

استانا. قازاقپارات -  اسسالاۋماعالەيكۋم! بىزدە كولىكپەن زيرات جانىنان ءوتىپ بارا جاتقاندا بەت سيپاپ جاتادى. مۇنداي شاريعاتتا بار ما؟ ياعني، قابىردىڭ جانىنان ءوتىپ بارا جاتقاندا بەت سيپاۋ دۇرىس پا؟

 ەرنات.

 ۋاعالەيكۋمۋسسالام! ەرنات، پايعامبارىمىزدىڭ (س. ع. ۋ) سۇننەتى بويىنشا قابىرگە كەلگەن ادام سول جەردە جاتقان ءارۋاقتارعا اللادان كەشىرىم تىلەپ، دۇعا ەتەدى. بۇل -  ساۋاپتى ءىس.

 ساحيح مۋسليمدە ريۋايات ەتىلگەن حاديستە ءجابرايىل پەرىشتە مۇحاممەد پايعامبارعا «باقيع قابىرىنە[1] بارىپ ول جەردەگى جاتقاندارعا «يستيعفار» (كەشىرىم تىلە) ەت!» دەگەن قۇدايدىڭ بۇيرىعىن جەتكىزەدى. پايعامبارىمىز (س. ع. ۋ) جابىرەيىل ايتقان قابىرگە كەلىپ، قولىن كوتەرىپ دۇعا ەتەدى. ۇيگە ورالىسىمەن ايشا انامىز: «(قابىردەگىلەرگە) نە دەيىن؟»، -  دەپ سۇرايدى. سوندا پايعامبارىمىز: «(قابىرگە بارعاندا) بىلاي دە: «ۋا ءمۇمين، مۇسىلمان قابىر يەلەرى! اللا تاعالا ءبىزدىڭ ولىلەرىمىزگە دە، تىرىلەرىمىزگە دە راقىم ەتسىن. اللا قالاعان كۇنى ءبىز دە سەندەردىڭ قاتارلارىڭا قوسىلامىز»[2]، -  دەپ جاۋاپ بەردى.

قازاقتاردىڭ قابىر قاسىنان ءوتىپ بارا جاتىپ بەت سيپاۋى پايعامبارىمىزدىڭ (س. ع. ۋ) وسى سۇننەتىنەن شىققان دۇنيە. الايدا، تەك بەت سيپاپ قانا قويماي سول جەردە جاتقاندارعا ىشتەي اللادان راحىم تىلەگەن دۇرىس. سوندا ءسىزدىڭ ارەكەتىڭىز قۇر بەت سيپاعاندىق ەمەس، پايعامبارىمىزدىڭ سۇننەتىن ورىنداعاندىق بولماق.

[1] مادينە قالاسىنىڭ وڭتۇستىك شىعىسىندا ورنالاسقان ساحابالاردىڭ ءمايىتى جەرلەنگەن قابىر. بۇنى «ءجانناتۋل باقيع» دەپ تە اتايدى.

[2] مۋسليم، كيتابۋل جانايز، (974) - 103 حاديس.

ابدۋسامات قاسىم