م. ەلەۋسىزوۆ: ەكولوگيا مينيسترلىگىن قايتادان قۇرۋ كەرەك

استانا. قازاقپارات - بۇگىن پارلامەنت ماجىلىسىندە «پاريج كەلىسىمىن راتيفيكاتسيالاۋ تۋرالى» زاڭ جوباسىن تالقىلاۋ كەزىندە «تابيعات» ەكولوگيالىق وداعىنىڭ باسشىسى مەلس ەلەۋسىزوۆ قازاقستاندا ەكولوگيا مينيسترلىگىن قايتا قۇرۋدى ۇسىندى.

«كليماتتىق، ەكولوگيالىق ماسەلەلەر وزەكتى ەكەنى بەلگىلى. نەگىزى ەكولوگيا مينيسترلىگى بولعانى دۇرىس. بۇعان دەيىن بىزدە وسىنداي وكىلەتتى ۆەدومستۆو بولعان ەدى. قازاقستاندا قورشاعان ورتانى قورعاۋ مينيسترلىگى قاجەت دەگەن تۇجىرىمدامىن. سوندىقتان اتالعان ۆەدومستۆونى قايتا قۇرۋ تۇرعىسىندا دەپۋتاتتار بۇل تاقىرىپتى كوتەرەدى دەپ پايىمدايمىن»، - دەدى ول.

سونىمەن قاتار م. ەلەۋسىزوۆ جاھاندىق كليماتتىق جاعدايعا توقتالا كەلە، بۇگىندە عالامشارداعى تەمپەراتۋرا جارتى گرادۋسقا كوتەرىلگەنىن، مۇزدىقتاردىڭ 44 پايىزى ەرىپ كەتكەنىن جەتكىزدى.

«ادامزات الدىندا سۋ پروبلەماسى تۋىنداۋدا. ءبىزدىڭ دە مۇزدىقتار ەرىپ جاتىر. حان تاڭىرىنە ارنايى ەكسپەديتسياعا قاتىسقان بولاتىنمىن جانە ونداعى ۇلكەن مۇزدىقتاردىڭ ەرۋىنىڭ كورىنىسى ۇرەي تۋدىرادى. نەبارى جارتى گرادۋسقا تەمپەراتۋرا وزگەرسە دە، مۇزدىقتاردىڭ ەرۋ ءۇردىسى جىلدامداي ءتۇستى»، - دەدى ول.

ايتا كەتەيىك، پاريج كەلىسىمى 2015 -جىلعى جەلتوقساندا ب ۇ ۇ- نىڭ كليماتتىڭ وزگەرۋى جونىندەگى نەگىزدەمەلىك كونۆەنسياسى تاراپتارىنىڭ 21- كونفەرەنسياسىندا فرانسيادا قابىلداندى. بۇل كەلىسىم جاھاندىق ورتاشا تەمپەراتۋرانىڭ جوعارىلاۋىنا جول بەرمەۋ باعىتىندا جۇمىس ىستەۋ، ياعني، تەمپەراتۋرانىڭ ورتاشا ءوسىمىن 2 گرادۋستان اسىرماۋدى، جاسىل ەكونوميكاعا قارجى كوزدەرىن كوپتەپ تارتۋ سەكىلدى نەگىزگى ماسەلەلەردى قامتىپ وتىر.

اۆتور: رۋسلان عابباسوۆ