التى جاسار اسەم وڭتۇستىك كورەيادا قايتىس بولدى
«ءبىزدىڭ اسەمىمىز باقيلىق بولدى... بۇگىن سەۋل ۋاقىتىمەن ساعات 13.10-دا قايتتى... اۋىر قازا... ول ماعان: «اكە مەن الىسىرەدىم!!! جۇرەگىم ەزىلىپ كەتتى!!!»، دەدى». قىزدىڭ اكەسى داۋلەت احمەتجانوۆ فەيسبۋكتەگى پاراقشاسىندا وسىلاي جازدى.
بۇگىن وتباسى سەۋلدەن ۇشىپ الماتى ارقىلى استاناعا كەلەدى. جەرلەۋ 3 - قازاندا ساعات 10.00-دە ەكىباستۇزدا وتەدى.
ەسكە سالا كەتسەك، 2015 - جىلى قىز بالاعا دياگنوز دۇرىس قويىلماعان، سالدارىنان ول شەتەلدە ەمدەلۋگە كۆوتا الا المادى.
«ءبىزدىڭ ورتانشى قىزىمىز اسەم، 5 جاس كەزىندە، 2015 -جىلدىڭ قازان ايىندا قاتتى اۋىرىپ قالدى. استاناداعى انا مەن بالا ورتالىعىنىڭ ونكولوگيالىق بولىمشەسىنە تۇستىك. وڭ جاق بۇيرەكتەرى نەفروبلاستوما دياگنوزىمەن اسەم ءۇش حيميوتەراپيا كۋرسىن الدى. قازان ايىندا وتامەن وڭ جاق بۇيرەكتەگى ىسىك الىندى. سونىمەن قاتار ىسىك باۋىرعا شاۋىپ كەتكەنى انىقتالدى. بۇدان سوڭ ءبىز حيميوتەراپيانى قىتايدا جالعاستىردىق. وندا جاڭا دياگنوز - قويىلدى. بۇل ەمدەلمەيتىن ءارى سيرەك كەزدەسەتىن اۋرۋ»، - دەپ جازادى احمەتجانوۆ.
جەلتوقساندا وتباسى ماسكەۋگە تەكسەرىلۋ ءۇشىن بلوحين اتىنداعى ونكولوگيالىق ورتالىققا اتتاندى. الايدا جاڭا جىلداعى مەرەكەلىك ۇزىلىسكە تاپ كەلگەن. سوندىقتان اتا- انا «دوبروۆولنوە وبشەستۆو «ميلوسەرديە» قوعامدىق قورىنان كومەك سۇرادى.
«بۇل قور كورەياعا بارۋعا كەڭەس بەردى. سول جەردەگى جاسالعان زەرتتەۋ سىناماسى وكپەدە، باۋىردا، جۇرەكتە ۆيلمس ىسىگى بار ەكەندىگىن كورسەتتى»، - دەيدى مارقۇم قىزدىڭ اكەسى.
كورەيالىق دارىگەرلەر 18 - قاڭتاردان باستاپ قازاقستاندىق ناۋقاسقا حيميوتەراپيا كۋرسىن جۇرگىزە باستادى.
اتا- انا ەمدەۋ اقىسىن تولەۋ ءۇشىن نەسيە العان. ال ولاردىڭ ايتۋىنشا شەتەلدە ەمدەلۋ ءۇشىن كۆوتا الۋ ماسەلەسى ۇزاققا سوزىلىپ كەتكەن.
