قىتايدا مەرەكە كۇنى كولىك اعىنى رەكوردتىق دەڭگەيگە جەتتى

استانا. قازاقپارات - قىتايدا ۇلتتىق مەرەكەنىڭ العاشقى كۇنىندە كۇرە جولدارداعى كولىكتەر اعىنى رەكوردتىق دەڭگەيگە جەتتى. بۇل 1-7 - قازان ارالىعىنداعى ءبىر اپتالىق دەمالىسقا قاتىستى،

 دەپ حابارلايدى حابار 24 تەلەارناسى.

ەل ۇكىمەتى وسى كۇندەرى 7 ورىنعا دەيىنگى جەڭىل كولىكتەردىڭ بارلىعىنا ماگيسترالداردا تەگىن جۇرۋگە جاعداي جاساپ وتىر. سونىڭ سالدارىنان ايماقتار اراسىن جالعاپ جاتقان ماڭىزدى جولداردا كولىك اعىنى كۇرت كوبەيىپ كەتتى.

رەسمي مالىمەت بويىنشا، مەرەكە كەزىندە تەمىرجول كولىگىن 14 ميلليوننان استام جولاۋشى پايدالانۋى ءتيىس. الايدا، مۇنداعى جۇرگىنشىلەر سانى دا كۇرت ارتقان.

ماسەلەن، گۋيجوۋ پروۆينتسياسىنىڭ ورتالىعى گۋيان قالاسىنداعى ۆوكزالدا 100 مىڭنان استام بيلەت ساتىلىپ كەتكەن. ال، كولىكتەردىڭ شەكتەن تىس كوبەيۋى ۇزىن- سونار كەپتەلىستەرگە اكەلىپ سوقتى. شاڭحاي قالاسىندا تۇتاس ءبىر اۆتوماگيسترالدا قاتىناس توقتاپ قالدى. الايدا ەلدەگى ەڭ ۇلكەن مەرەكە كەزىندەگى بۇل جاعدايعا حالىق قالىپتى قۇبىلىس رەتىندە قارايتىن بولعان.