مارات سارسەنبايەۆ: «حالال مونشا» قوعامعا قاجەت

استانا. قازاقپارات - «اتامەكەن» ۇلتتىق كاسىپكەرلەر پالاتاسى جانىنداعى «اتامەكەن» پىكىرتالاس كلۋبى «قازاقستاندا حالال يندۋسترياسىنىڭ دامۋ جاعدايى» تاقىرىبىندا كەزەكتى وتىرىسىن وتكىزدى.

بۇل تۋرالى baq.kz حابارلايدى.

كەزدەسۋ بارىسىندا ەلىمىزدەگى جالپى تاۋارلار مەن قىزمەت تۇرلەرىنە «حالال» سەرتيفيكاتىن الۋ توڭىرەگىندە اڭگىمە قوزعالدى.

ارنايى وتىرىسقا قاتىسقان «حالال» ستاندارتتاۋ تەحنيكالىق كوميتەتىنىڭ پرەزيدەنتى مارات سارسەنبايەۆ بۇگىنگى تاڭدا قوعامدا «حالال» ۇعىمى تەك تاماقتانۋ سالاسىن عانا قامتيدى دەگەن تەرىس تۇسىنىك قالىپتاسقاندىعىن ايتتى.

«قازىرگى كەزدە «حالال»، «حارام» دەپ اجىراتۋ وتە ورىندى. شىن مانىسىنە كەلەر بولساق، حالال ۇعىمىنىڭ ءوزى - ءومىر ءسۇرۋ سالتى. تاڭعى ىشەتىن شايىڭىز دا، جەگەن تاعامىڭىز دا، ءجۇرىس- تۇرىسىڭىز دا «حالال» بولۋى كەرەك»، - دەيدى مارات اعىباي ۇلى.

«حالال مونشا» دەپ ەشكىم ازىرگە سەرتيفيكات الا قويعان جوق. ءبىراق بولۋى كەرەك. مىسالى، ءدىنىمىز بويىنشا ەر ادام دىزەدەن جوعارى، كىندىكتەن تومەنگى دەنەسىن ەشكىمگە كورسەتپەۋى كەرەك. ءتىپتى ەر ادام بولسا دا. ال قازىرگى ۋاقىتتا، اسىرەسە قوعامدىق مونشالاردا اتاسى، بالاسى نەمەرە- شوبەرەسىمەن تىرجالاڭاش ءبىر مونشاعا تۇسە بەرەتىن بولدى. ايەل ادامدار دا سونداي. سوندىقتان «حالال مونشا» قالىپتاستىراتىن ۋاقىت جەتتى ءبىز ءۇشىن»، - دەيدى ول.

ونىڭ ايتۋىنا قاراعاندا، «حالال» ۇعىمى جەڭىل ونەركاسىپ، قىزمەت كورسەتۋ، ساقتاندىرۋ سالاسى سياقتى قوعامنىڭ بارلىق اسپەكتىلەرىن قامتيدى.

باسقوسۋدا نارىق ۇسىنىپ وتىرعان تاۋارلاردىڭ بارلىعى، اسىرەسە، تاماق ونىمدەرى «حالال» سەرتيفيكاتى تالاپتارىنا ساي وندىرىلە مە، تاۋارلاردىڭ تاڭبالانۋىنا قانشالىقتى سەنۋگە بولادى، قىزمەت كورسەتۋدە تۇتىنۋشى قۇقىعى ەسكەرىلىپ جاتىر ما دەگەن سۇراقتار سارالانىپ، «حالال» يندۋسترياسى توڭىرىگىندەگى ماسەلەلەر كەڭىنەن تالقىلاندى.

 

Stan.kz