ەسەنتايەۆتىڭ قىزى سوتتا اكەسىنىڭ قورعاۋشىسى بولاتىندىعى جونىندە اقپاراتتى جوققا شىعاردى

استانا. قازاقپارات - باقىتبەك ەسەنتايەۆتىڭ قىزى ايساۋلە سوتتا اكەسىنىڭ قورعاۋشىسى بولمايتىندىعىن ءمالىم ەتتى.

«مەن سوتتا اكەمنىڭ قورعاۋشىسى بولمايمىن، مەن بۇل ىستە تەك كۋاگەرمىن. مەن جاز بويى تەرگەۋ يزولياتورىنداعى اكەمە بارۋ ءۇشىن ونىڭ قوعامدىق قورعاۋشىسى بولدىم، الايدا قورعاۋشى ءارى كۋاگەر رەتىندە بولۋ زاڭعا قايشى. سوندىقتان مەن ونىڭ قورعاۋشىسى بولا المايمىن»، - دەپ جازدى ول ينستاگرامداعى پاراقشاسىندا.

سونىمەن قاتار، ول اكەسىن دە شەشەسىن دە جاقسى كورەتىنىن اتاپ ءوتتى.

بۇعان دەيىن ايىپتالۋشىنىڭ ادۆوكاتى بەكبولات جەكسەيىتوۆ ايساۋلە باقىتبەك اكەسىن سوتتا قورعايتىنىن ءمالىم ەتكەن بولاتىن.

ەسكە سالا كەتسەك، 28 -قىركۇيەكتە قاسكەلەڭ مامانداندىرىلعان اۋدانارالىق سوتتا باقىتبەك ەسەنتايەۆقا قاتىستى ءىس بويىنشا سوت تالقىسى باستالدى. ال سوتتىڭ العاشقى وتىرىسى تالدىقورعاندا 18 قازاندا وتەتىنى بەلگىلى بولدى.

باقىتبەك ەسەنتايەۆقا كەلىنشەگىن سوققىعا جىعىپ، پىشاقتادى دەگەن ايىپ تاعىلعان. تانىمال پروديۋسەردى 10 -ماۋسىمدا اۋىر جاعدايدا اۋداندىق اۋرۋحاناعا جەتكىزدى، وعان سوندا وتا جاسالعان بولاتىن.