قازاقستاندىق كومىرگە سۇرانىس تومەندەدى

استانا. قازاقپارات - قازاقستان كومىرىنە سۇرانىس تومەندەدى. اسىرەسە رەسەيگە ەكسپورت باسەڭدەگەن. بۇعان سەبەپ، كورشى ەلدەگى يمپورتتى الماستىرۋ ساياساتى. سونداي- اق رەسەي بيلىگى نوۆوكۋزنەتسك ءونىمىنىڭ سۇرانىسىن ارتتىرۋ تالابىن قويىپ وتىر.

قازاقستاننان شەتەلگە، ونىڭ ىشىندە رەسەيگە تاسىمالداناتىن قاتتى وتىننىڭ دەنى ەكىباستۇزدان شىعارىلادى. جىل باسىنان ەلدەن بار- جوعى 12 ميلليون توننا كومىر ەكسپورتتالعان. بۇل وتكەن جىلعى كورسەتكىشتەن 20 پايىزعا كەم.

ال سوڭعى 8-ايدا 57,8 ميلليون توننا ءوندىرىلدى، بۇل بىلتىرعىدان 5,3 پايىزعا كەم. سالا ماماندارى جىل سوڭىنا دەيىن ءوندىرىس تاعى 5-6 پايىزعا تومەندەۋى مۇمكىن دەپ وتىر. ويتكەنى  ۇلى بريتانيا، فينليانديا، جاپونيا جانە وڭتۇستىك- شىعىس ازيا مەملەكەتتەرىنە شيكىزات اسىرۋدا كەدەرگىلەر تۋىنداعان.

باۋبەك توقتاعازين، كەن ءوندىرۋ جانە تاۋ- كەن مەتاللۋرگيا ونەركاسىبى قاۋىمداستىعىنىڭ ساراپشىسى:

ءبىرىنشى نەگىزگى سەبەپ، رەسەيلىك كومىر ءوندىرۋشى كومپانيالارىنىڭ قولدان جاساپ وتىرعان كەدەرگىلەرى. سونىمەن قاتار تاۋاردى تاسىمالداۋعا بەرىلەتىن شەكتەۋلەر. ءبىراق بۇل باعىتتا جاسالىپ جاتقان جۇمىستاردىڭ وڭدى شەشىلەتىنىن بايقاپ وتىرمىز. ەۋرازيالىق ەكونوميكالىق كوميسسيانىڭ مونوپولياعا قارسى بلوگىنىڭ قاتىسۋى مەن قولداۋى ارقاسىندا تەڭىز پورتتارى مەن تەرمينالدارىنا قولجەتكىزۋگە بايلانىستى ەرەجە قابىلدانۋى ءتيىس. بۇل ماسەلە جىل سوڭىنا دەيىن شەشىلەدى دەگەن ويدامىز.

ASTANATV. KZ