سىعىرلىق جايىندا نە بىلەسىز؟

استانا. قازاقپارات - ميوپيا -  الىستان كورمەۋشىلىكتىڭ اسقىنعان ءتۇرى، ياعني سىعىرلىق. گرەك تىلىنەن اۋدارعاندا «ميو» -  سىعىرايۋ، «وپسيس» -  كورۋ دەگەن ماعىنانى بىلدىرەدى.

دۇنيەجۇزىندە ءاربىر ءۇشىنشى ادام ميوپيامەن اۋىرادى ەكەن. سونداي- اق بۇل -  جاسوسپىرىمدەر اراسىندا ەڭ ءجيى كەزدەسەتىن كوز اۋرۋى. سىعىرلىق كوبىنەسە مەكتەپ جاسىنداعى بالالاردا باستاپقى ءۇش جىلدان باستالىپ بايقالادى. سونىمەن قاتار ميوپيانىڭ تۇقىم قۋالايتىن تۋابىتتى ءتۇرى دە بولادى. دەسە دە، سوڭعى جىلدارى بالالار اراسىندا بەلەڭ الىپ بارا جاتقان سىعىرلىقتىڭ باستى سەبەپتەرىنىڭ ءبىرى -  كومپيۋتەر، ۇيالى تەلەفوندار مەن پلانشەتتەر ەكەنىن جاسىرماۋىمىز كەرەك. كۇنى كەشكە دەيىن قولىنان تاستاماي پلانشەت ۇستاپ جۇرەتىن بالالاردىڭ كوزىنە ادەتتەگىدەن ون ەسە ارتىق سالماق ءتۇسىپ، كورۋ قابىلەتىن بارىنشا زاقىمدايدى. سوندىقتان اتا- انالار وسىعان ءمان بەرگەندەرى ءجون.

 ميوپيانىڭ پايدا بولۋ سەبەپتەرىن ەكى توپقا ءبولىپ قارايمىز.

 جالپى اعزالىق فاكتورلار:

 اعزانى السىرەتەتىن اۋرۋلار (انەميا، دارۋمەن جەتىسپەۋشىلىگى) ؛

 تۇقىم قۋالاۋشىلىق (ەگەر ميوپيا اتا- اناسىنىڭ بىرىندە بولسا، اسىرەسە، ەكەۋىندە دە بولعان جاعدايدا بالانىڭ بۇل اۋرۋعا شالدىعۋ مۇمكىندىگى 70 پايىزعا ارتادى ەكەن) ؛

 ​  كورۋ قىزمەتىنە اسەرىن تيگىزەتىن فاكتورلار:

 جارىقتىڭ جەتىسپەۋشىلىگى (مەكتەپتە، ۇيدە) ؛

 وقىعان، جازعان كەزدە ورىندىقتا دۇرىس وتىرماۋى (ورىندىق، ۇستەلدىڭ بالانىڭ بويىنا سايكەس كەلمەۋىنەن، كولىكتە ءجۇرىپ وقۋ، جاتىپ وقۋ) ؛

 كۇن ءتارتىبىنىڭ دۇرىس بولماۋى (مىسالى، سپورتپەن شۇعىلداناتىن بالالاردا سيرەگىرەك كەزدەسەدى، ال ميوپيالى بالالاردىڭ كوبىنىڭ ومىرتقا جۇيەسىندە وزگەرىستەر بولىپ جاتادى. ) ؛

 كوزگە اۋىرتپالىق تۇسىرەتىن تەلەديدار، كومپيۋتەر، ۇيالى تەلەفوندى شامادان تىس قولدانۋ؛

 دۇرىس تاماقتانباۋ.

 اۋرۋدىڭ بەلگىلەرى:

 الىستان كورمەۋ؛

 كوزدىڭ بۇلدىراۋى؛

  الىستان جاقىنعا نەمەسە كەرىسىنشە قاراعاندا كوزگە اۋىرتپالىقتىڭ ءتۇسۋى؛

 زاتتاردىڭ ەكى ەسەلەنىپ كورىنۋى؛

 الىستاعى زاتتاردى ايىرا الماۋ؛

 الىستاعى زاتتاردى تانۋ ءۇشىن كوزدى سىعىرايتىپ قاراۋ.

 ميوپيانىڭ الدىن الۋ ءۇشىن:

 بالانىڭ اعزاسىن نىعايتۋ (سپورتپەن شۇعىلدانۋ، ۋاقىتىلى دۇرىس تاماقتانۋ) ؛

 كوزدىڭ بۇلشىق ەت جۇيەلەرىن بەكىتۋ؛

 كوزدىڭ قان اينالىمىن جاقسارتۋ؛

 سكلەرانى بەكىتۋ (كوز جاتتىعۋلارىن جاساۋ) ؛

 بالالاردىڭ كۇن ءتارتىبىن رەتتەۋ (وقۋ، دەمالۋ، تەلەديدار قاراۋ، كومپيۋتەر ويناۋ ۋاقىتتارىن بەلگىلەۋ) ؛

 تازا اۋادا سەرۋەندەۋ؛

 وقۋ بولمەلەرىنىڭ جارىقتانۋىن، ساباق دايىندايتىن ورىندىق پەن ۇستەلىنىڭ بالا بويىنا ساي بولۋىن قاداعالاۋ.

 كوز اۋرۋلارىن ەمدەۋ ءۇشىن جاسالاتىن جاتتىعۋلار:

 كوزدى 5-6 سەكۋند بويى جىپىلىقتاتىپ تۇرۋ. ازداعان ۇزىلىستەن سوڭ جاتتىعۋدى تاعى ءبىر رەت قايتالاڭىز.

 كوزدى تاس جۇمىپ، 3-5 سەكۋندتان كەيىن قايتا اشىڭىز. جاتتىعۋدى 6-8 رەت قايتالاڭىز.

 ورنىڭىزدان تۇرىپ، قولىڭىزدى الدىڭىزعا سوزىپ، سۇق ساۋساعىڭىزدىڭ ۇشىنا قاراڭىز. ساۋساعىڭىز ەكەۋ بولىپ كورىنگەنشە كوزىڭىزدى الماي، وزىڭىزگە قاراي جىلجىتا بەرىڭىز. 6-8 رەت قايتالاڭىز.

 باسىڭىزدى قوزعاماستان جوعار- تومەن قاراڭىز. 8-12 رەت قايتالاڭىز.

موينىڭىزدى بۇرماستان وڭعا- سولعا قاراڭىز. 8-12 رەت قايتالاڭىز.

 شىنتاعىڭىزدى ۇستەلگە تىرەپ، الاقاندارىڭىزبەن كوزدەرىڭىزدى باسىڭىز. جاتتىعۋ ۇزاقتىعى -  5 مينۋت. وسى جاتتىعۋدى كۇنىنە 2-3 رەت قايتالاڭىز. الاقانىڭىزدان تاراعان جىلۋ مەن قاراڭعىلىق كوزدىڭ شارشاۋىن باسادى.

 ءار قولىڭىزعا ءبىر- بىردەن قارىنداش ۇستاڭىز. بىرەۋىن كوزىڭىزدەن 15 س م قاشىقتىقتا تىك ۇستاڭىز. ال ەكىنشىسىن الدىڭىزعا سوزىلعان قولىڭىزدىڭ قاشىقتىعىندا ۇستاڭىز. سودان سوڭ كوزىڭىزدى ءبىر قارىنداشقا توعىستىرىڭىز دا، كىرپىگىڭىزدى قاعىپ، كوزقاراسىڭىزدى ەكىنشى قارىنداشقا اۋدارىڭىز. بۇل جاتتىعۋدى كۇنىنە 2 رەت جاساڭىز.

 ەكى اياعىڭىزدى ءبىر- بىرىنەن الشاق قويىپ، بۇكىل دەنەڭىزبەن ءبىر جاعىڭىزدان ەكىنشى جاعىڭىزعا قاراي بۇرىلىڭىز. الىستاۋ تۇرعان ءبىر نارسەگە قادالا قاراڭىز. جاتتىعۋدى 50 رەت قايتالاڭىز.

دەرەككوز: anabol.kz