مەكسيكادا جولاۋشىلارعا تىكۇشاق- تاكسي قىزمەتى ۇسىنىلدى

استانا. قازاقپارات - مەكسيكادا تاكسي قىزمەتىنىڭ جاڭا ءتۇرى ەنگىزىلدى.

ەندى اسىققان جولاۋشىلار قالاداعى كولىك كەپتەلىسىنىڭ ۇستىمەن ۇشىپ وتە الادى. بۇل ءۇشىن Cabify تاسىمال كومپانياسى مەن تۋريستىك قىزمەتتەر ۇسىناتىن مەكەمە كەلىسىمگە كەلىپ، تىكۇشاق- تاكسي قىزمەتىن ۇسىنعان.

 ازىرگە ولار مەحيكوداعى اۋەجاي مەن قالا ورتالىعىندا عانا جولاۋشىلار تاسيدى. ءار تىكۇشاققا 5 ادام وتىرادى. ءبىراق ءبىر جولاۋشى وزىمەن بىرگە 10 كەلىدەن ارتىق جۇك الىپ جۇرە المايدى. ال قىزمەت قۇنى 95 دوللار.

تىكۇشاق تاكسي قىزمەتىن ۇسىنۋشىلاردىڭ ايتۋىنشا، بۇل قولجەتىمدى باعا. ويتكەنى 20 ميلليون تۇرعىنى بار شاھاردا كەپتەلىستە قاڭتارىلماي، وسى قىزمەتتى تۇتىنا الاتىن قالتالى ازاماتتار جەتەرلىك.

«تىكۇشاق تاكسيلەرىنىڭ قىزمەتى لاتىن امەريكاسىندا العاش رەت جولاۋشىلارعا ءوز قىزمەتىن ۇسىنىپ وتىر. قولايلىلىعى جاعىنان ا ق ش، ەۋروپاداعى وسىنداي قىزمەت تۇرلەرىمەن سالىستىرعاندا ەشقانداي كەم تۇسپەيدى»، - دەيدى Cabify كومپانياسىنىڭ مەنەدجەرى ريكاردو ۆەدەر.

«حابار 24»