ەلباسى ەرتىس وزەنىندەگى كوپىر وتكەلىنىڭ قۇرىلىسىمەن تانىستى
ەرتىس وزەنى ارقىلى وتەتىن كوپىر وتكەلى «نۇرلى جول» ينفراقۇرىلىمدىق دامۋ باعدارلاماسى اياسىندا ىسكە اسىرىلىپ جاتقان «ورتالىق- شىعىس» اۆتوجول قۇرىلىسى جوباسىنىڭ ءبىر بولىگى بولىپ سانالادى.
نۇرسۇلتان نازاربايەۆ بۇل جوبانى ىسكە اسىرۋعا جۇمىلدىرىلعان قۇرىلىسشىلارمەن جانە جۇمىسشىلارمەن كەزدەستى. اڭگىمەلەسۋ بارىسىندا ول «نۇرلى جول» باعدارلاماسى اياسىندا مەملەكەت تاراپىنان وبلىستىڭ كولىك ينفراقۇرىلىمىن جاقسارتىپ، ينۆەستيتسيالىق تارتىمدىلىعىن ارتتىرۋ ءۇشىن قاجەتتى بارلىق جاعدايلار جاسالا بەرەتىنىن ايتتى.
جول- قۇرىلىس كاسىپورىندارىنىڭ وكىلدەرى ەلدىڭ ينفراقۇرىلىمدىق جاڭعىرتىلۋىنا ارنالعان مەملەكەتتىك باعدارلامالاردىڭ ىسكە اسىرىلىپ جاتقانى ءۇشىن قازاقستان پرەزيدەنتىنە العىس ءبىلدىردى.
بۇل ورتالىق ازياداعى ەڭ ۇزىن كوپىر وتكەلى. قۇرىلىس بارىسىندا مەردىگەرلىك جۇمىستارعا ءوڭىردىڭ شاعىن جانە ورتا بيزنەس سۋبەكتىلەرى تارتىلۋدا. 400 دەن استام جۇمىس ورنى اشىلدى. كوپىر وتكەلىن پايدالانۋعا بەرۋ پاۆلودار قالاسىنىڭ جول- كوشە تورابىنىڭ جۇگىن جەڭىلدەتىپ، كولىك- ترانزيت اعىنىن وڭتايلاندىرۋعا سەپتىگىن تيگىزەدى.
