بۋرابايداعى بەس جۇلدىزدى قوناق ۇيلەر ادامدارعا لىق تولى
بۇل تۋرالى «قازاقپاراتقا» بەرگەن سۇحباتىندا اقمولا وبلىسى تۋريزم باسقارماسىنىڭ باسشىسى شىناربەك باتىرحانوۆ ءمالىم ەتتى.
«ءبىزدىڭ كۋرورتقا دەمالۋعا كەلەتىندەردىڭ 60 پايىزى قازاقستاندىقتار، 30 پايىزى - رەسەيلىكتەر، ال قالعان 10 پايىزى الىس شەتەلدەن كەلگەن قوناقتار»، - دەدى ش. باتىرحانوۆ.
سونىمەن قاتار قوناق ۇيلەر مەن شيپاجايلارداعى جوعارى باعانىڭ قالىپتاسۋى ماسەلەسىنە توقتالعان ول، بۇگىندە كۋرورتتا باعانىڭ باستى رەتتەۋشىسى نارىق پەن ونىڭ زاڭدىلىقتارى ەكەنىن اتاپ ءوتتى.
«بۇگىندە باعانى نارىق قالىپتاستىرىپ وتىر، بارلىعى سۇرانىس پەن ۇسىنىس اياسىندا ايقىندالۋدا. ەگەر دە بيزنەس سۋبەكتىلەرى باعانى ساۋاتسىز قويسا، ونىڭ ىسكەرلىگى ۇزاققا بارماي، بانكروتقا تاپ بولادى»، - دەيدى ول.
ونىڭ سوزىنە قاراعاندا، بۇگىندە قىمباتشىلىعى ءۇشىن قازاقستانداعى كۋرورتتارعا قاتىستى سىن ايتىلىپ جاتسا دا، ەلىمىزدەگى بەس جۇلدىزدى قوناق ۇيلەر دەمالىس كەزەڭىندە تۋريستەر اراسىندا سۇرانىسقا يە.
«ريكسوستا» تاۋلىكتىك باعا 70 مىڭ تەڭگە شاماسىندا، الايدا وندا ورنالاسۋ قيىنعا تۇسەدى. ياعني، بۇل ءوز كەزەگىندە قوناق ءۇي ۇلكەن سۇرانىسقا يە ەكەنىن بايقاتىپ وتىر»، - دەدى باتىرحانوۆ.
بەلگىلى بولعانداي، اقمولا وبلىسىندا كۋرورتتىق جۇيە ءۇش سەگمەنتكە بولىنەدى.
«ءبىرىنشىسى - ەليتالىق دەمالىس نىساندارى، بۇلار قالتالى تۋريستەرگە ەسەپتەلگەن جانە وندا ورىندار تولىق. ەكىنشى سەگمەنت ءبىز ءۇشىن ماڭىزدىراق. ولار تۋريستەر جاپپاي باراتىن نىساندار، ياعني وسى باعىتتا ءۇش جۇلدىزدى پانسيوناتتار، تۋريستىك بازالار، شيپاجايلار، دەمالىس ۇيلەرى قامتىلعان. بۇل نىسانداردىڭ قۇنى تاۋلىگىنە 5 تەن 15 مىڭ تەڭگە ارالىعىندا. نومىرلەردىڭ ساناتىنا قاراي، ءۇش، ءتورت نەمەسە بەس مارتە تاماقتاندىرۋ كەستەسى بار، سونىمەن قاتار ەم- دوم جاساۋ قىزمەتتەرى دە كىرەدى. بۋرابايداعى ءۇشىنشى سەگمەنت بالالار دەمالىسىنا ارنالعان نىساندار»، - دەدى باتىرحانوۆ.
ونىڭ ايتۋىنشا، وڭىردە بۇگىندە شيپاجايلارعا تۋريستەردى قىس كەزىندە دە تارتۋ بويىنشا ءتيىستى جۇمىستار ءجۇرىپ جاتىر.
«بۇگىندە قىسقى دەمالىسقا ايتىرلىقتاي ۇلكەن ەكپىن قويىلىپ وتىر. ءبىزدىڭ كۋرورتتىق جۇيەدە ساۋىقتىرۋ شارالارىن العىسى كەلەتىندەرگە كوكتەمدى، كۇزدى جانە قىستى ۇسىنامىز. سەبەبى، جازدا ادامدار كوپتەپ جينالعان كەزدە ءارقايسىسىنا جەكەلەي ساپالى قىزمەت كورسەتۋ قيىنداۋ بولادى. سوندىقتان جىلدىڭ وزگە مەزگىلدەرى وڭالتۋ شارالارى ءۇشىن ماڭىزدى»، - دەپ ءتۇيدى ول.
