اراب ايەلدەرى جاپپاي كۇيەۋلەرىنە قارسى شىعا باستادى

استانا. قازاقپارات - ازيزا ءال- يۋسۋف ساۋد ارابياسىنداعى مۇسىلمان ايەلدەردىڭ پروبلەماسىن ءجيى كوتەرىپ جۇرگەن بەلسەندى كەلىنشەكتەردىڭ ءبىرى.

بۇل جولى ول كۇيەۋىنىڭ رۇقساتىنسىز قىز- كەلىنشەكتەردىڭ ءىس- ارەكەتىن شەكتەيتىن ءبىرقاتار شاريعات نورمالارىن الىپ تاستاۋدى كوزدەيتىن پەتيتسياعا 14 مىڭ قول جيناعان دەپ حابارلايدى baq.kz.

قۇجات ۇكىمەتتىڭ قاراۋىنا جىبەرىلدى. قازىرگى قالىپتاسقان ءداستۇر بويىنشا، ايەل ادام نەكەلەسۋ نەمەسە اجىراسۋ تۋرالى شەشىم قابىلداي المايدى، قامقورلىققا العان ەر ادامنىڭ رۇقساتىنسىز ءبىلىم الۋعا قۇقىعى جوق، جۇمىسقا ورنالاسا المايدى، شەتەلگە شىعىپ ساياحاتتاۋ ءۇشىن دە قامقورشىسىنىڭ كەلىسىمىن الۋعا مىندەتتى. كوپ جاعدايدا قامقورشىسى دەگەنىمىز - اكەسى، كۇيەۋى نەمەسە اعاسى.

ەڭ سوراقىسى، قامقورشىسىنىڭ رۇقساتىنسىز ايەل ادام پاتەر جالداماق تۇگىلى، ءتىپتى، وزىنە وتا دا جاساتا المايدى ەكەن.

وسىناۋ شەكتەۋلەرگە توسقاۋىل قويۋ ءۇشىن قول جيناۋ ينتەرنەت جەلىسى ارقىلى قارقىندى قولداۋ تاۋىپ كەلەدى.

bbc- گە سۇحبات بەرگەن قوعام بەلسەندىسى ازيزا ءال- يۋسۋف ءوزى باسكوز بولعان باستاما ۇلكەن قولداۋ تاپقانىنا قۋانىپ، قاندايدا ءبىر وڭ شەشىمنىڭ قابىلدانۋىنا سەپتىگىن تيگىزەرىنە سەنىم ءبىلدىردى.