جولاۋشىلار ۇشاعى ماڭىنان بەلگىسىز نىسان ۇشىپ ءوتتى
اگەنتتىكتىڭ مالىمەتتەرى بويىنشا، «اەروفلوت» ۇشاقتارىنىڭ قىتاي جانە كورەي اۋە جولدارىنىڭ ۇشۋ ەكيپاجدارى ماسكەۋ ۋاقىتىمەن تۇنگى ۇشتە تومسك وبلىسىنان 120 شاقىرىم جەردە جارىق شاشقان نۇكتەنى بايقاعان. از ۋاقىتتا ول نۇكتە بولىكتەرگە ءبولىنىپ، تاراپ كەتكەن.
الدىن الا بولجام بويىنشا، ەكيپاجدار مەتەوريتتىڭ جەر اتموسفەراسىنا ەنۋىن جانە جانىپ كەتۋىن كورۋى مۇمكىن، دەيدى اقپارات كوزى. ونىڭ ايتۋىنشا، اتالعان اۋدانداعى اۋە وقيعاسىن توتەنشە قىزمەتتەر راستاعان جوق.
وسى اپتادا ومبى پلانەتاريىنىڭ ديرەكتورى ۆلاديمير كرۋپكو وبلىستىڭ سولتۇستىگىندەگى زنامەنسك اۋدانىندا بولعان جەر قوزعالىسى مەتەوريتتىڭ قۇلاۋىنان دەپ بولجاعان ەدى. قۋاتى 4,7 ماگنيتۋدا بولدى دەپ حابارلانعان جەر سىلكىنىسىن ايماقتىق ت ج م تەرىسكە شىعاردى، دەپ حابارلادى جەرگىلىكتى ب ا ق.
وتكەن جىلدىڭ قاراشا ايىندا ومبى تۇرعىندارى اسپاننان ەرەكشە جارقىراعان نىسان كورىپ، ونى بۇن نەمەسە مەتەوريت دەپ ويلاعان ەدى. الايدا، ولاردىڭ استاراحان وبلىسىنداعى كاپۋستين يار پوليگونىنان ستراتەگيالىق ماقساتتاعى زىمىران اسكەرلەرىنىڭ ر س-12م «توپول» قۇرلىقارالىق بالليستيكالىق زىمىرانىن سىناۋ ءۇشىن ۇشىرىلعانى انىقتالدى.
