بەكبولات تىلەۋحان ۇزىناعاشتاعى قاندى ۋاقيعاعا بايلانىستى دەپۋتاتتىق ساۋال جولدادى
بۇگىن ق ر پارلامەنتى ءماجىلىسىنىڭ جالپى وتىرىسىنان كەيىن ەلىمىزدىڭ ىشكى ىستەر مينيسترىنە دەپۋتاتتىق ساۋال جولداعان ماجىلىسمەن بەكبولات تىلەۋحان وسىلاي ايتتى.
«وتكەن اپتادا الماتى وبلىسىنىڭ جامبىل اۋدانىندا بولعان جانتۇرشىگەرلىك وقيعا، قانقۇيلى قىلمىس بۇكىل ەلدىڭ قابىرعاسىن قايىستىرىپ وتىر. ادال ەڭبەگىمەن بالا- شاعاسىن اسىراپ جۇرگەن ەسىل ازاماتتار دولدان ۇلى جارقىنبەك، زارلىحان ۇلى مۇقيات، ءالىمحان قادىلبەكتىڭ ايدىڭ- كۇننىڭ امانىندا قاراقشىلاردىڭ قولىنان ايۋاندىقپەن قازا تابۋى جانىمىزدى جابىرقاتىپ وتىر. كەشە عانا جەر قوينىنا تاپسىرىلعان وسى قىرشىنداردىڭ، مارقۇمداردىڭ وتباسىلارىنىڭ قايعىلارىنا ورتاقتاسىپ كوڭىل ايتامىز. 8 بالانى جەتىم قالدىرىپ كوز جاسىنا قالعان قاراقشىلاردىڭ ءادىل جازا الۋىن پارلامەنت ماجىلىسىندەگى «نۇر وتان» فراكسياسى ايرىقشا نازارىندا ۇستايتىندىعىنا سەندىرگىمىز كەلەدى، جۇباتقىمىز كەلەدى»، - دەدى ب. تىلەۋحان.
سونىمەن قاتار ول بۇل ءبىر وتباسىنىڭ عانا ەمەس بۇكىل قوعامنىڭ جۇرەگىنە ءتۇسىپ وتىرعان اۋىر سالماق ەكەندىگىن باسا ايتتى.
«قوعامنىڭ دەرتىن تازارتۋعا ەكپىن بەرۋگە ءبىز مىندەتتىمىز. اتا كاسىبى مال شارۋاشىلىعى بولعان ەلدە مال ۇرلىعىنا ءۇستىرت قاراۋ، پوليتسيا تارابىنان قاجەتتى نازاردىڭ كەمشىن بولۋى دا جاسىرىن ەمەس. جالپى، سوڭعى كەزدە قاراپ وتىرساق، بەيبىت ەلدىڭ بەرەكەسىن العان ەكسترەميزم مەن تەرروريزم، نارەستەسىن كۇرەسىنگە لاقتىرعان انا، انا دەۋگە كەلسە ەگەر، ادامدىقتان بەزگەن پەدوفيليا سىندى قىلمىستار قوعامدا ءورشىپ بارا جاتىر. جالپى، مۇنىڭ ەمى وتە اۋقىمدى شارالارعا مۇقتاج ەكەندىگى تۇسىنىكتى عوي. ءبىراق، ازىرشە، وسى ورايدا ىشكى ىستەر مينيسترلىگىنە تومەندەگىدەي ساۋالدار جولدايمىن. مينيسترلىك وسى ىسپەتتەس قىلمىستاردى الدىن الۋ جانە بولدىرماۋ ماقساتىندا قانداي جۇمىستار اتقارماق؟ اسىرەسە، قازىرگى كەزدە جەرگىلىكتى پوليتسيا قىزمەتى قۇرىلعاننان كەيىن. ەكىنشىدەن، وسىنداي قوعامنىڭ الاڭداتۋشىلىعىن تۋدىرعان قىلمىستاردى ەرەكشە كاتەگورياداعى قىلمىستار دەپ باعالاپ، ولارعا بەرىلەتىن جازانى بارىنشا كۇشەيتۋ ءۇشىن قانداي شارا قولدانىلماق؟»، - دەدى دەپۋتات.
اۆتور: مارلان جيەمباي
