ءاليا نازاربايەۆا مەن اقان ساتايەۆ «اناعا اپارار جول» فيلمىنىڭ تۇساۋىن كەستى

استانا. قازاقپارات - بۇگىن كەشكە الماتىداعى رەسپۋبليكا سارايىندا رەجيسسەر اقان ساتايەۆتىڭ «اناعا اپارار جول» كينوكارتيناسىنىڭ تۇساۋى كەسىلدى.

قىزىل كىلەممەن اكتەرلار مەن ءتۇسىرىلىم توبىنىڭ مۇشەلەرى ءجۇرىپ ءوتتى. تۇساۋكەسەر سالتاناتىنا اتالمىش فيلمنىڭ باس پروديۋسەرى بولىپ تابىلاتىن ءاليا نازاربايەۆا دا كەلدى.

«ۇلكەن شىعارماشىلىق ۇجىمىمىزعا العىس ايتقىم كەلەدى، ولارسىز بۇل فيلم دە بولماس ەدى. بۇگىن بۇل كەش ءبىرىنشى كەزەكتە، قۇرمەتتى انالار، سىزدەرگە ارنالادى»، - دەدى ءا. نازاربايەۆا.

«بۇگىنگى ناتيجەمىزگە ءبىر جارىم جىل بويى ۇمتىلدىق. تۇسىرىلگەن فيلمدەرىمنىڭ اراسىندا «اناعا اپارار جولدىڭ» ورنى ەرەكشە. بىرىنشىدەن، ءبىز بۇل كارتينانى انالارىمىزعا ارنادىق. ەكىنشىدەن، سسەناري يدەياسى كەزىندە اتا- انالارىم ايتىپ بەرگەن وقيعا نەگىزىندە تۋىندادى»، - دەپ اتاپ ءوتتى اقان ساتايەۆ.

فيلم مادەنيەت جانە سپورت مينيسترلىگى مەن «قازاق فيلم» كينوستۋدياسىنىڭ قولداۋىمەن ءتۇسىرىلدى. انا ءرولىن تەاتر جانە كينو ءارتىسى التىناي نوگەربەك سومدادى. سونداي- اق باستى رولدەردى ءادىل احمەتوۆ، ارۋجان جازىلبەكوۆا جانە ەركەبۇلان دايىروۆ وينادى. «اناعا اپارار جول» كارتيناسىنىڭ سسەناريىن تيمۋر جاقسىلىقوۆ جازدى. مۋزىكالىق ارلەۋ ءالىم زايىروۆتىكى.

 كينوكارتينا تاعدىردىڭ ءتۇرلى سوققىلارىنا توزۋگە كومەكتەسكەن - انالىق ماحابباتتىڭ قۇدىرەتى تۋرالى. وقيعا جەلىسى 1930 -جىلدان باستاپ وسى كۇنگە دەيىنگى ۋاقىتتى قامتيدى. تاريحي دراما قازاقستاندا، بەلارۋستا جانە ازەربايجاندا ءتۇسىرىلدى. ونىڭ جۇمىسىنا بارلىعى ەكى مىڭنان استام ادام قاتىستى.