اقساق قاز كۇيىنىڭ اڭىزى
ال شىعۋ تاريحى تۋرالى وسى ءتورت نۇسقاعا ورتاق ءبىر- اق ءتۇرلى اڭگىمە شەرتەدى.
جازعى جاسىل جايلاۋدىڭ كوز قۇرتىن تارتار ءسانىنىڭ ءبىرى كول جاعالاي، وزەندى بويلاي، جايلاۋ ءتوسىن دۋمانعا بولەگەن قاز بولسا كەرەك. اققانات بالاپاندارىن ارتىنان ەرتىپ وزىنە ءتان ۇنىمەن ومەر ءانىن شىرقاعان ءبىر توپ قازعا ات ءمىنىپ، ەل قىدىرۋدان باسقا شارۋاسى جوق مەرگەنسىماق جىگىتتىڭ كوزى تۇسەدى. ول بەيعام جۇرگەن قازدىڭ شىرقىن بۇزىپ، شىراپاتىن شىعارۋدى ەرمەك سانايدى، ەرلىك كورەدى.
قازدى اتىپ ولجالاۋدى ارمانداعان جىگىت، ءبىر كۇنى مىلتىعىن الادى دا كول جاعالاي ءبىرى ۇشىپ، ءبىرى قونىپ، ءوز قىزىعىنا ماساتتانىپ جۇرگەن قازدارعا بەت تۇزەيدى. قامىس جيەگىن پانالاي كەلگەن مەرگەنسىماق قازعا وعىم داريدى- اۋ دەگەن مەجەلى جەرگە توقتايدى دا، ءبىر توپ بالاپانىن ارتىنان ەرتكەن ەنە قازدى قاراۋىلعا الادى. بالاپاندارىنىڭ ءتاي- ءتاي ءجۇرىسىن قىزىقتاپ تۇرعان ەنە قازدىڭ تۇرىسى جىگىت دەگبىرىن قوزدىرادى. مىلتىق داۋىسى تارس ەتە تۇسەدى دە ويىندا قۋانىشتان باسقا ەشتەڭە جوق ەنە قاز قاناتىن قاعىپ- قاعىپ جىبەرىپ، ۇشارعا دارمەنى جوق ەكەنىن بىلگەننەن كەيىن كولگە ءتۇسىپ باياۋ جۇزە جونەلەدى. جاڭا عانا قاناتىن قومداپ جۇرگەن بالاپاندار شۋلاي ۇشىپ ارالعا ءوتىپ كەتەدى.
ەنە قاز دا ارالعا ىلىنەدى. قازدى قانجىعاسىنا بايلاماسا دا وعى تيگەنىنە ماساتتانعان جىگىت اتىنا ءمىنىپ، اۋىلعا تارتادى.
بالاپاندارىن ەرتىپ ارالدى مەكەندەگەن، ۇشارعا دارمەنى جوق اقساق قاز ۋايىممەن سولادى. كۇن ارتىنان كۇن كەلىپ، كۇز بولادى. قۇس قايتادى. بارلىق قۇس ءساندى ساپ قۇرىپ، ءان مارجانىن توگىلتىپ وڭتۇستىككە بەت العاندا بەيشارا بولعان اقساق قاز عانا مۇڭ مەن زارىن توگىپ ۇيىرىنەن ايىرىلىپ قالا بەرەدى. كۇيشى اقساق قازدىڭ وسى مۇڭىن كۇيگە قوسقان ەكەن دەيدى.
كۇي اڭىزى بايان- ولگي قازاقتارىنىڭ دومبىرا جانە سىبىزعى كۇيلەرى جيناعىنان الىندى
ارنايى shynyrau.kz ءۇشىن دايىندالدى
