ۇكىمەت باسشىسى ۇزىناعاشتاعى قاندى وقيعانى ىشكى ىستەر ءمينيسترىنىڭ جەكە باقىلاۋىنا الۋىن تاپسىردى

استانا. قازاقپارات - مال ساتپاق بولعان اعايىندىلاردى ولتىرگەن قىلمىسكەرلەر تۇتقىندالدى. بۇل تۋرالى بۇگىن ۇكىمەت وتىرىسىندا ق ر ىشكى ىستەر ءمينيسترى قالمۇحانبەت قاسىموۆ ءمالىم ەتتى.

 «جۇمىسىمىزدى باستاماس بۇرىن، ىشكى ىستەر مينيسترىنە ءبىر ساۋالىم بار. قالمۇحانبەت نۇرمۇحانبەت ۇلى، حالىقتىڭ اراسىندا الماتى وبلىسىندا بولعان جانتۇرشىگەرلىك وقيعا كوپ ايتىلىپ، تالقىلانىپ جاتىر. قازىر ءبىلىپ وتىرمىز، قىلمىسكەرلەر ۇستالدى. قاجەتتى تەرگەۋ شارالارى جۇرگىزىلىپ جاتىر. وسىعان بايلانىستى، حالىقتىڭ الاڭداۋشىلىعى كوپ بولعاندىقتان مالىمەت بەرىپ وتسەڭىز»، - دەدى ۇكىمەت باسشىسى باقىتجان ساعىنتايەۆ ىشكى ىستەر ءمينيسترى قالمۇحانبەت قاسىموۆقا قاراتا.

 ءوز كەزەگىندە مينيستر 20 - قىركۇيەك كۇنى الماتىعا مال ساتامىز دەپ بارعان 3 ازاماتتىڭ جوعالىپ كەتۋىنە بايلانىستى ىشكى ىستەر ورگاندارىنا ارىز تۇسكەنىن، اتالعان فاكتى بويىنشا قىلمىستىق ءىس قوزعالعانىن اتاپ ءوتتى.

 «ولار 2 كولىكپەن 41 مال باستى الماتى وبلىسىنا ساتۋ ءۇشىن بارعان. ءبىز 21 - قىركۇيەك كۇنى ءبىرىنشى كولىكتى جانە 23- كۇنى ەكىنشى كولىكتى تاپتىق. مۇنان ارى، جەرگىلىكتى تۇرعىنداردىڭ اتالعان كولىكتەردىڭ جۇرگىزۋشىلەرىنە كومەك بەرگەنىن انىقتادىق. ولار باتپاققا تۇرىپ قالعان. مۇنان كەيىن جامبىل اۋدانىنىڭ تۇرعىندارى ولاردىڭ كىم ەكەندەرىن ايتتى. وسى تۇلعالاردىڭ كومەگىمەن ءبىز قىلمىسكەرلەردى، جامبىل اۋدانىنىڭ ەكى تۇرعىنىن انىقتادىق. ولار بازاردا جاپا شەگۋشىلەرگە كەلىپ، بارلىق مالدى كوتەرمە باعامەن ساتىپ الۋدى ۇسىنعان. ولاردى الداپ تاۋ اراسىنا الىپ شىعىپ، سول جەردە ۇشەۋىن دە ولتىرگەن. مال مەن مۇردەلەردى الىپ كەلە جاتقان كەزدە كولىكتەرى باتپاققا تۇرىپ قالعان. مۇنان سوڭ جەرگىلىكتى تۇرعىنداردان كومەك سۇراعان. قازىرگى ۋاقىتتا قىلمىسكەرلەر ۇستالدى. قىلمىس جاسالعان قارۋ تاركىلەندى. قىلمىسكەرلەر ءوز ەركىمەن مۇردەلەردىڭ كومىلگەن جەرىن كورسەتۋگە نيەت ءبىلدىرىپ، ءبىز  زارداپ شەككەندەردىڭ مايىتتەرى كومىلگەن جەرگە باردىق. قاجەتتى ساراپتامالار تاعايىندالدى. بۇگىن اتالعان اۋىلداردا جەرلەۋ راسىمدەرى وتەدى. 35 باس مال الىندى. الماتى وبلىستىق ءى ءى د تەرگەۋ امالدارىن جۇرگىزۋدە. قىسقا مەرزىم ىشىندە تەرگەۋ اياقتاپ، سوتقا جولدايمىز دەپ ويلايمىن. ءبىز بۇل ءىستى ءوز باقىلاۋىمىزعا الامىز»، - دەدى ق. قاسىموۆ.

 وسى رەتتە ب. ساعىنتايەۆ مينيسترگە تەرگەۋ بارىسىن جەكە باقىلاۋعا الۋدى تاپسىردى. «قوعامدىق قاۋىپسىزدىك جانە قىلمىسپەن كۇرەس بۇل ماڭىزدى مىندەت. ءبىز مۇنى ۇكىمەتتىڭ جەكە وتىرىسىندا قارايمىز»، - دەپ اتاپ ءوتتى پرەمەر- مينيستر.

اۆتور: مارلان جيەمباي