سەنات ەلباسىنىڭ سىنىنا وراي زاڭ ساپاسىنا مەيلىنشە ءمان بەرمەك

استانا. قازاقپارات - قاسىم- جومارت توقايەۆتىڭ ءتوراعالىق ەتۋىمەن سەنات بيۋروسىنىڭ وتىرىسى ءوتتى.

ءتوراعا ءوز سوزىندە پالاتا قىزمەتىندەگى ءبىرقاتار ۇيىمداستىرۋ ماسەلەلەرىن جاريا ەتتى.

اتاپ ايتقاندا، سەناتتىڭ كادرلىق وزگەرىستەردەن كەيىن ق. توقايەۆ پارلامەنتتىڭ جوعارعى پالاتاسى ءتوراعاسىنىڭ ورىنباسارلارى اراسىنداعى مىندەتتەردى ءبولۋ تۋرالى وكىمگە قول قويعان بولاتىن. بەكتاس بەكنازاروۆقا زاڭنامالىق قىزمەتتى جۇزەگە اسىرۋعا بايلانىستى، ونىڭ ىشىندە سەناتتىڭ جۇمىس جوسپارىن ازىرلەۋ جانە تۇراقتى كوميتەتتەردىڭ زاڭ جوبالارىمەن جۇمىسىن ۇيىمداستىرۋ ماسەلەلەرىن ۇيلەستىرۋ جۇكتەلدى.

ودان باسقا، بەكنازاروۆ رەگلامەنت جانە دەپۋتاتتىق ەتيكا جونىندەگى كوميسسيانىڭ مۇشەسى بولىپ تابىلادى. ءتوراعا ورىنباسارىنىڭ قاتىسۋىمەن كوميسسيا جۇمىسى جالعاسا بەرەدى. سەرگەي گروموۆ سەناتتىڭ ماسليحاتتارمەن ءوزارا ءىس- قيمىلى، دەپۋتاتتىق توپتاردىڭ قىزمەتى، سەناتورلاردىڭ ايماقتارعا ساپارى، سونداي- اق قارجى- شارۋاشىلىق قىزمەتىن ۇيلەستىرۋ ماسەلەلەرىمەن اينالىسادى.

سەنات ءتوراعاسى زاڭ جوبالارىمەن جۇمىس بارىسىندا رەگلامەنتتىڭ تالاپتارىن قاتاڭ ساقتاۋ قاجەتتىگىنە بيۋرو مۇشەلەرىنىڭ نازارىن اۋداردى. «ءاربىر زاڭ جوباسىن جان- جاقتى تالقىلاپ، ولاردىڭ ساپاسىنا ايرىقشا ءمان بەرىپ بايىپتى شەشىم قابىلداۋ - ءبىزدىڭ باستى مىندەتىمىز. ەلباسى قابىلدانعان كەيبىر زاڭداردىڭ ساپاسىنا قاتىستى ءادىل سىن ايتقان بولاتىن. سەناتتىڭ زاڭداردى قابىلداپ ەلباسىنىڭ قول قويۋىنا ۇسىنۋى سەناتورلارعا اسا جاۋاپتى مىندەت جۇكتەيتىنىن تەرەڭ سەزىنۋىمىز قاجەت»، - دەدى ق. توقايەۆ.

بيۋرودا پالاتانىڭ 29 -قىركۇيەكتە بولاتىن كەزەكتى وتىرىسىنىڭ كۇن ءتارتىبى كەلىسىلدى. سەناتورلار «1994 -جىلعى 15 -ساۋىردەگى ۇلى وتان سوعىسىنىڭ قاتىسۋشىلارى مەن مۇگەدەكتەرىنە، باسقا مەملەكەتتەردىڭ اۋماعىنداعى ۇرىس قيمىلدارىنا قاتىسۋشىلارعا، قازا تاپقان اسكەري قىزمەتشىلەردىڭ وتباسىلارىنا ارنالعان جەڭىلدىكتەر مەن كەپىلدىكتەردى ءوزارا تانۋ تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاتسيالاۋ تۋرالى» جانە «قازاقستان رەسپۋبليكاسىنىڭ ۇكىمەتى مەن سەربيا رەسپۋبليكاسىنىڭ ۇكىمەتى اراسىنداعى تابىس پەن كاپيتالعا سالىناتىن سالىقتارعا قاتىستى قوسارلانعان سالىق سالۋدى بولدىرماۋ جانە سالىق سالۋدان جالتارۋعا جول بەرمەۋ تۋرالى كونۆەنتسيانى جانە وعان حاتتامانى راتيفيكاتسيالاۋ تۋرالى» زاڭ جوبالارىن قارايدى.

بيۋرو قاۋلىسى بويىنشا ماجىلىستەن تۇسكەن زاڭ جوبالارى ءبولىنىپ بەرىلدى. الەۋمەتتىك- مادەني دامۋ جانە عىلىم كوميتەتىنە «حالىقارالىق عىلىمي- تەحنيكالىق ورتالىقتىڭ قىزمەتىن جالعاستىرۋ تۋرالى كەلىسىمدى راتيفيكاتسيالاۋ تۋرالى» زاڭ جوباسى بەرىلدى. حالىقارالىق قاتىناستار، قورعانىس جانە قاۋىپسىزدىك كوميتەتى «قازاقستان رەسپۋبليكاسى مەن تاجىكستان رەسپۋبليكاسى اراسىنداعى ستراتەگيالىق ارىپتەستىك تۋرالى شارتتى راتيفيكاتسيالاۋ تۋرالى» زاڭ جوباسى بويىنشا باس كوميتەت بولىپ بەلگىلەندى.

وتىرىستا 2016 -جىلعى قازاندا ەلىمىزدە بيولوگيالىق الۋان تۇرلىلىكتىڭ ساقتالۋىن زاڭنامالىق قامتاماسىز ەتۋدىڭ وزەكتى ماسەلەلەرىنە ارنالعان پارلامەنتتىك تىڭداۋ وتكىزۋ تۋرالى شەشىم قابىلداندى. اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتى تىڭداۋدى ۇيىمداستىرۋعا جاۋاپتى بولىپ بەلگىلەندى. سونداي- اق قازاندا جول قوزعالىسى سالاسىنداعى قۇقىقتىق رەتتەۋ ماسەلەلەرى جونىندەگى تىڭداۋ وتكىزۋ بەلگىلەندى، ونى كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتى ۇيىمداستىراتىن بولدى.

«پارلامەنتتىك تىڭداۋلار قابىلدانعان زاڭداردىڭ ىسكە اسىرىلۋ بارىسى تۋرالى جان- جاقتى جانە تولىق اقپارات الىپ، ءتۇيىندى ماسەلەلەردى تەرەڭ زەردەلەۋگە مۇمكىندىك بەرەدى، - دەدى ق. توقايەۆ. - بۇل پالاتالاردىڭ كونستيتۋتسيادا بەلگىلەنگەن قۇقىعى، وسى مۇمكىنشىلىكتى الداعى كەزەڭدە كەڭىنەن قولدانۋىمىز قاجەت».

ودان باسقا، بيۋرو سەناتورلاردى حالىقارالىق پارلامەنتتىك ۇيىمدارعا جانە پارلامەنت سەناتىنىڭ شەت مەملەكەتتەر پارلامەنتتەرىمەن ىنتىماقتاستىق جونىندەگى توپتارىنا جىبەرۋ تۋرالى قاۋلى قابىلدادى.