قازا تاپقان ءۇش جىگىتتىڭ تەرگەۋ جۇمىستارى الماتى وبلىستىق ىشكى ىستەر دەپارتامەنتى باسشىلىعىنىڭ قاتاڭ باقىلاۋىنا الىندى
«اعايىندى جىگىتتەردىڭ ولىمىنە بايلانىستى ماتەريالدىق كومەك كورسەتىلەدى دەگەن كەيبىر ب ا ق- تارداعى اقپارات دۇرىس ەمەس. رەسمي تۇردە مالىمدەيمىن. الدىن الا ءبىز ەشقانداي ۋادە بەرگەنىمىز جوق. تەرگەۋ ءجۇرىپ جاتىر. كۇدىكتىلەر ۇستالدى. سوت ءوتسىن، انىقتالسىن. بۇل قىلمىستىق وقيعا. قازاقپىز عوي، اۋدان، اۋىل اكىمدەرىنە تاپسىرما بەردىك، بارىپ، قايعىلارىنا ورتاقتاسىپ، قارايلاسۋ جاعىن تاپسىردىق. اۋدان اكىمى وتىن، سۋىن ءتۇسىرىپ بەرىپ قولدان كەلگەنشە كومەگىن كورسەتىپ جاتىر. اكىمشىلىك شەت قاراپ وتىرعان جوق. مۇسىلماننىڭ پارىزى عوي كوڭىل ايتۋ. وبلىس اكىمى باقىلاۋىندا ۇستاپ وتىر. بۇگىنگى اپپارات جيىنىندا سۇراپ، تاپسىرمالارىن بەردى» ، - دەدى باحتيار ونەربايەۆ.
ەسكە سالا كەتەيىك، وتكەن جەكسەنبىدە ب ا ق- تا الماتى وبلىسى جامبىل اۋدانىندا مال ساۋداسىمەن اينالىسىپ جۇرگەن ءۇش جىگىتتىڭ جوعالىپ كەتكەنى تۋرالى حابارلانعان بولاتىن.
مارقۇمداردىڭ تۋىسقاندارىنىڭ ايتۋىنشا، دولدان ۇلى جارقىنبەك (1979 -جىلى تۋعان) ، زارلىحان ۇلى مۇقيات (1973 -جىلى تۋعان) ، ءالىمحان قادىلبەك شىعىس قازاقستان وبلىسىنىڭ تارباعاتاي اۋدانىنان ساتىپ العان 40 باس مالدى ەكى جۇك كولىگىمەن 17 قىركۇيەك كۇنى ۇزىناعاش بازارىنا شىعارعان. سودان ءىز- ءتۇزسىز جوعالىپ كەتكەن. بىرنەشە كۇننەن كەيىن ولاردىڭ دەنەسى تابىلدى.
24 -قىركۇيەكتە الماتى وبلىستىق ىشكى ىستەر دەپارتامەنتىنىڭ باسپا ءسوز قىزمەتى ءىز- ءتۇزسىز جوعالعان ءۇش اعايىندىنىڭ ولىمىنە قاتىستى كۇدىكتىلەر ۇستالعانىن حابارلادى.
«وبلىستىق ءى ءى د باسشىسىنىڭ ءبىرىنشى ورىنباسارى پودپولكوۆنيك نۇرلان ءماسىموۆ باسشىلىق ەتكەن ىزدەۋ شارالارىنا اۋداندىق جانە ايماقتىق پوليتسەيلەر دە جۇمىلدىرىلدى. جوعالعانداردى ءولتىردى دەگەن كۇدىكپەن جامبىل اۋدانىنىڭ ەكى ازاماتى ۇستالدى. جابىرلەنۋشىلەردىڭ دەنەلەرى تابىلدى. ق ر ق ك 99-بابى، 2- ءبولىمى بويىنشا (كىسى ءولتىرۋ) قىلمىستىق ءىس قوزعالدى» ، - دەلىنگەن باسپا ءسوز قىزمەتىنىڭ حابارىندا.
كىسى ءولتىرۋ فاكتىسى بويىنشا تەرگەۋ جۇمىستارى الماتى وبلىستىق ىشكى ىستەر دەپارتامەنتى باسشىلىعىنىڭ قاتاڭ باقىلاۋىنا الىنعان.
اۆتور: الماس مۇقاش ۇلى
