قوستانايدا لەۆيت پەن دىچكوعا اۆتوكولىكتەر سىيعا تارتىلدى
بۇل تۋرالى «ۆكونتاكتە» الەۋمەتتىك جەلىسىندەگى Team LEVIT توبىندا حابارلاندى.
«كەشە قوستانايلىق وندىرۋشىلەر ءۇشىن وقيعاعا تولى ءارى ماڭىزدى كۇن بولدى. ماشينا جاساۋ سالاسىنىڭ وكىلدەرى مەملەكەت باسشىسىنا اۋىل شارۋاشىلىعى تەحيكاسى ءوندىرىسىنىڭ اعىمداعى جاعدايى تۋرالى بايانداپ، JAC ەلەكتروموبيلدەرى تانىستىرىلدى. ەلباسى جەكە ءوزى ەلەكتروموبيل JAC كولىگىن سىناقتان وتكىزدى. سونىمەن قاتار مەملەكەت باسشىسى ريو وليمپياداسىنىڭ كۇمىس جۇلدەگەرى ۆاسيلي لەۆيتپەن كەزدەستى»، - دەپ اتاپ وتىلگەن حابارلامادا.
ال تۇستەن كەيىن جاڭا تەننيس كورتىندا ي. دىچكو مەن ۆ. لەۆيت جاس سپورتشىلارمەن جۇزدەسىپ، ساۋالدارىنا جاۋاپ بەردى. سونىمەن قاتار سپورتشىلارعا قوشەمەت كورسەتۋ اياسىندا ولارعا JAC S3 كولىگى سىيعا تارتىلدى.
بۇدان بۇرىن حابارلانعانداي، وليمپيادا فينالىندا ەۆگەني تيشەنكو ۆاسيلي ليەۆيتتى جەڭگەننەن كەيىن زالدا وتىرعان جانكۇيەرلەر رەسەيلىككە جەڭىستى الىپ بەرگەن تورەشىلەر شەشىمىنە نارازىلىق تانىتتى. سپورتشىلار 91 كەلىگە دەيىنگى سالماق ساناتىندا جۇدىرىقتاسقان بولاتىن. كەزدەسۋ اياقتالعاننان كەيىن ءبىراۋىزدان تورەشىلەردىڭ شەشىمىمەن جەڭىس 2015 -جىلعى الەم چەمپيونى رەسەيلىك ەۆگەني تيشەنكوعا بەرىلدى. مۇنداي شەشىمگە ريزا بولماعان كورەرمەندەر ايقايلاپ، نارازىلىقتارىن تانىتتى. ءتىپتى ءبىرقاتارى «قازاقستان!» دەپ ۇرانداتقان دا بولاتىن.
سودان كەيىن ق ر بوكس فەدەراتسياسىنىڭ باسپا ءسوز قىزمەتى ريو وليمپياداسىنىڭ كۇمىس مەدالىن ەنشىلەگەن ۆاسيلي لەۆيتكە 250 مىڭ دوللار سىياقى بەرىلەتىنىن حابارلادى. اتالعان سوما وليمپيادا التىنىن العان سپورتشىعا بەرىلەتىن سىياقىمەن تەڭ.
«ۆاسيليي ليەۆيت وليمپيادا رينگىنىڭ فينالدىق كەزدەسۋىندە تاماشا ناتيجە، جەڭىسكە دە ايرىقشا ەرىك- جىگەر كورسەتتى. ول وليمپيادانىڭ كۇمىس مەدالىن جەڭىپ العاننان كەيىن وعان مەملەكەت 150 مىڭ دوللار سىياقى بەرەدى. بۇعان قوسا، قازاقستان بوكس فەدەراتسياسىنىڭ پرەزيدەنتى ت. ق ۇلىبايەۆتىڭ شەشىمىمەن اتالعان سوماعا تاعى دا 100 مىڭ دوللار قوسىلادى. وسىلايشا لەۆيتتىڭ سىياقىسى «التىنمەن» تەڭەسەدى»، - دەلىنگەن حابارلامادا.
سونداي- اق فەدەراتسيا ۆ. لەۆيتتى وليمپيادا مەدالىمەن قۇتتىقتاپ، ونىڭ قازاقستان بوكس فەدەراتسياسىنىڭ، جاتتىقتىرۋشىلار شتابىنىڭ جانە بۇكىل ەلدىڭ سەنىمىن اقتاعاندىعىن اتاپ وتكەن.
اۆتور: رۋسلان عابباسوۆ
