ايەلىڭىزدىڭ مىنەزى ناشار بولسا نە ىستەۋ كەرەك؟

استانا. قازاقپارات - حاليفا وماردىڭ (ر. ا. ) كەزىندە ءبىر كىسى ايەلىنىڭ مىنەزىنىڭ ناشارلىعىن ايتىپ شاعىمدانباق بولىپ ونىڭ ۇيىنە كەلەدى.

ءبىراق ۇيىنە كىرە بەرىستەن حاليفانىڭ ايەلىنىڭ وعان ۇرىسىپ جاتقانىن ەستىپ قالادى دا: «ءيا. ەگەر حاليفانىڭ ۇيىندە وسىنداي بولىپ جاتسا، مەنىڭ شاعىم ايتقانىم جاراماس!» دەپ ويلاپ بۇرىلىپ ەندى كەتىپ بارا جاتقانىندا ومار (ر. ا. ) ونى بايقاپ قالادى دا:

- بىرنارسە سۇرايىن دەپ پە ەدىڭ؟ - دەيدى.

سوندا كىسى بولعان جايدىڭ بارلىعىن، ءتىپتى ونىڭ ايەلىنىڭ ۇرىسقانىن دا ەستىپ قالعانىن ايتىپ بەرەدى.

سوندا حاليفا:

- بىلەسىڭ بە، مەن ايەلىمنىڭ اشۋلانعان ساتتەرىندە ۇندەمەۋگە تىرىسام. سەبەبى ول مەنىڭ تاماعىمدى دايىنداپ، كىرىمدى جۋىپ، بالالارىمدى باعىپ، بار جاعدايىمدى جاساپ وتىرادى. جانىم مەن ءتانىمدى تىنىشتاندىرىپ، كۇنالى ىستەرگە بارۋىما جول بەرمەيدى. سوندىقتان ونىڭ كەيبىر ەركەلىكتەرى مەن مىنەزىنە كوز جۇما قارايمىن. سەنىڭ دە سولاي جاساعانىڭ دۇرىس بولادى، - دەپ جاۋاپ بەرەدى.

asylsoz.kz