داۋرەن ابايەۆ: اقپارات جانە كوممۋنيكاتسيا ماسەلەسىنە قاتىستى نورمالار قوعامدىق تالقىلاۋ ارقىلى عانا قابىلدانۋى ءتيىس
ق ر اقپارات جانە كوممۋنيكاتسيالار ءمينيسترى داۋرەن ابايەۆ ءوزىنىڭ فەيسبۋكتەگى پاراقشاسىندا وسىلاي دەپ جازدى.
«قىمباتتى دوستار! اسىرەسە جۋرناليستەردىڭ، بايلانىس جانە اقپارات قىزمەتكەرلەرىنىڭ، ازاماتتىق سەكتور وكىلدەرىنىڭ نازارىنا! بۇگىن ءبىزدىڭ مينيسترلىك «اشىق نورماتيۆتىك قۇقىقتىق اكتىلەر» پورتالىنا «اقپارات جانە كوممۋنيكاتسيالار ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە تولىقتىرۋلار مەن وزگەرتۋلەر ەنگىزۋ تۋرالى» قازاقستان رەسپۋبليكاسى زاڭىنىڭ جوباسىنا قاتىستى تۇجىرىمدامانى ورنالاستىردى.
بۇل قۇجات بىزگە قاراستى سالادا ەلەۋلى وزگەرىستەر جاساۋعا باعىتتالعان جانە كاسىبي توپتاردىڭ كەڭ اۋقىمى مەن جالپى جۇرتشىلىقتىڭ مۇددەلەرىن قامتيدى. مەن مۇنداي نورمالار ازاماتتىق تالقىلاۋ ارقىلى عانا قابىلدانۋى تيىستىگىنە نىق سەنىمدىمىن. تۇجىرىمداما جاريالانعان بولىمدە ءوز ەسكەرتۋلەرىڭىزدى، ۇسىنىستارىڭىز بەن تالاپ- تىلەكتەرىڭىزدى قالدىرۋعا بولاتىن ارنايى فۋنكتسيا بار. ونىڭ بارلىعىن مينيسترلىك جانىنداعى زاڭ شىعارماشىلىق جونىندەگى جۇمىس توبى قاراستىراتىن بولادى»، - دەدى مينيستر.
اۆتور: مارلان جيەمباي
