لاڭكەستىككە قارسى وپەراتسيا كەزىندە قازاقستاندىقتاردىڭ ۇيالى بايلانىسى بۇعاتتالادى
بۇل تۋرالى بۇگىن ەلوردادا ءوتىپ جاتقان «قازىرگى كەزەڭدەگى ەكسترەميزم مەن تەرروريزمنىڭ الدىن الۋ مەن جولىن كەسۋدىڭ زاڭنامالىق جانە ينستيتۋتسيونالدىق شارالارى» تاقىرىبىنداعى دوڭگەلەك ۇستەل وتىرىسىندا ق ر ۇلتتىق قاۋىپسىزدىك كوميتەتى ءتوراعاسىنىڭ ورىنباسارى نۇرعالي بىلىسبەكوۆ ءمالىم ەتتى.
«لاڭكەستىككە قارسى وپەراتسيا جۇرگىزۋ تيىمدىلىگىن ارتتىرۋ ماقساتىندا 1-2 شاقىرىمدىق لوكالدى ايماق راديۋسىندا جەلىنى بۇعاتتاۋ ءۇشىن سايكەسىنشە تەحنيكالىق قۇرالدار ساتىپ الۋ ماسەلەسى قاراستىرىلۋدا. بۇل لاڭكەستەردىڭ قولدان جاسالعان جارىلعىش قۇرىلعىلاردى ىسكە قوسۋ، سونىمەن قاتار تەرروريستىك اكتىنى جۇزەگە اسىرۋ كەزىندە ءبىر- بىرىمەن حابارلاسۋ ءۇشىن بايلانىس قۇرالدارىن پايدالانۋىن بولدىرماۋعا بايلانىستى قولعا الىنباق»، - دەدى ول.
بىلىسبەكوۆتىڭ ايتۋىنشا، ىشكى ىستەر ورگاندارىنىڭ جەدەل باسقارۋ ورتالىقتارىنا قوسىلعان بەينە باقىلاۋ كامەرالارىنىڭ سانىن 4 مىڭنان 51 مىڭعا دەيىن ۇلعايتۋ دا جوسپارلانۋدا.
ق ر ۇ ق ك ءتوراعاسىنىڭ ورىنباسارى لاڭكەستىك قاۋىپكە مونيتورينگ جاساۋ جانە ونى دەر ۋاقىتىندا الۋدىڭ ماڭىزدى ەلەمەنتى حالىقتىڭ كوممۋنيكاتسيالىق مۇمكىنشىلىگىن پايدالانۋ بولىپ وتىر. بۇل ماقساتتارعا اقپارات جانە كوممۋنيكاتسيالار مينيسترلىگى ءۇش ساندى «110» ءنومىرىن ءبولدى. ول ۇ ق ك- نىڭ بارلىق تەرريتوريالىق ورگاندارىنا قوسىلعان. قالالىق جانە اۋداندىق تەلەفون ستانسالارىنىڭ ابونەنتەرىمەن دە تۇراقتى بايلانىس قامتاماسىز ەتىلگەن. ەندىگى ۋاقىتتا KCell, Activ, Altel جانە Tele-2 ۇيالى بايلانىس وپەراتورلارىن «110» ءبىرىڭعاي نومىرىنە قوسۋ ماسەلەسى قاراستىرىلۋدا.
«رەسپۋبليكا تەرريتورياسىندا تەرروريستىك قاۋىپتىڭ «سارى» دەڭگەيى ەنگىزىلگەننەن بەرى حالىقتىڭ اقپاراتتىق بەلسەندىلىگى 2 ەسەگە جۋىق ارتتى. اي سايىن ۇلتتىق قاۋىپسىزدىك ورگاندارىنا كۇدىكتى زاتتار، تەراكتىگە دايىندىق بەلگىلەرىنە قاتىستى 50-گە دەيىن دابىل ءتۇسىپ، وعان وراي جەدەل قىزمەتتەر شۇعىل ارەكەت جاسايدى»، - دەدى ن. بىلىسبەكوۆ.
اۆتور: مارلان جيەمباي
