تەرروريزم مەن ەكسترەميزم جىل سايىن قاۋىپتى ماسەلەگە اينالىپ بارادى - نىعماتۋلين
ەلوردادا ءوتىپ جاتقان دوڭگەلەك ۇستەل وتىرىسىندا ق ر پارلامەنتى ءماجىلىسىنىڭ ءتوراعاسى نۇرلان نىعماتۋلين وسىلاي دەدى.
«بارشاڭىز جاقسى بىلەسىزدەر، ەلىمىزدىڭ قاۋىپسىزدىگى مەن حالقىمىزدىڭ بەيبىت ءومىرى - ول ءبىزدىڭ باعا جەتپەس بايلىعىمىز. وسىنى ساقتاپ، قورعاپ، ودان ارى دامىتۋعا ۇلەسۋ قوسۋ - ءبارىمىزدىڭ ابىرويلى مىندەتىمىز. ەلباسى ن. نازاربايەۆ تاۋەلسىزدىك العان كۇننەن باستاپ قازاقستاننىڭ قاۋىپسىزدىك ماسەلەسىنە ءارقاشان دا ەرەكشە نازار اۋدارىپ كەلەدى. بۇگىنگى كۇنى وسى باعىتتا ەلىمىزدە كوپتەگەن جۇمىستار اتقارىلدى. ءبىراق تا وزدەرىڭىز كورىپ جۇرگەندەي، تەرروريزم مەن ەكسترەميزم جىل سايىن قاۋىپتى ماسەلەگە اينالىپ بارادى. بۇل تەك قازاقستانداعى عانا ەمەس بۇكىل الەمدەگى پروبلەما»، - دەدى ن. نىعماتۋلين.
وسى ورايدا ءماجىلىس سپيكەرى تەرروريزم مەن ەكسترەميزمگە قارسى كۇرەس بويىنشا ەلباسى ناقتى تاپسىرمالار بەرىپ، ونىڭ ورىندالۋ جولدارىن دا كورسەتكەنىن ەسكە سالىپ ءوتتى.
«ەڭ باستىسى بۇل ماسەلەگە بۇكىل قوعام قاتىسىپ، شىنايى قولداۋدى كورسەتىپ وتىر. وسىنىڭ ناتيجەسىندە ءبىز دە پىكىر جۇرگىزىپ، ساپالى، ءتيىمدى جانە وتكىر زاڭ جوباسىن ازىرلەۋ ماقساتىندا جۇمىس ىستەپ جاتىرمىز. بۇل ءبىز ءۇشىن ەرەكشە ماڭىزدى»، - دەدى ول.
سونىمەن قاتار سپيكەر زاڭ جوباسىن تالقىلاۋعا پارلامەنت دەپۋتاتتارىمەن قاتار ءتيستى ورگاندار، ۇكىمەتتىك ەمەس ۇيىمدار مەن ماجىلىسكە كىرمەگەن بارلىق پارتيالاردىڭ مۇشەلەرى، جۋرناليستەر، ەلىمىزگە بەلگىلى ساياساتكەرلەر تارتىلعانىن ايتتى.
«پرەزيدەنتىمىز ن. نازاربايەۆ ايتقانداي، وسىنىڭ بارلىعى ەلىمىزدىڭ ءاربىر ازاماتىن قورعاۋعا، زاڭنىڭ ءتيىمدى جۇمىس ىستەۋىنە، مەملەكەتىمىزدىڭ قاۋىپسىزدىگىن ساقتاۋعا زور ىقپال ەتەتىن بولادى. وسى زاڭ جوباسى بويىنشا 5 كودەكس پەن 19 زاڭعا وزگەرىستەر ەنگىزىلەدى»، - دەدى ن. نىعماتۋلين.
دوڭگەلەك ۇستەل وتىرىسى «قازىرگى كەزەڭدەگى ەكسترەميزم مەن تەرروريزمنىڭ الدىن الۋ مەن جولىن كەسۋدىڭ زڭنامالىق جانە ينستيتۋتسيونالدىق شارالارى» تاقىرىبىندا ءوتىپ جاتىر.
