پاراليمپيادا جۇلدەگەرلەرى وليمپيادا جەڭىمپازدارىمەن بىردەي سىياقى الاتىن بولدى

استانا. قازاقپارات - پاراليمپيادا جۇلدەگەرلەرى وليمپيادا جەڭىمپازدارىمەن بىردەي سىياقى الاتىن بولدى.

بۇل تۋرالى بۇگىن ق ر مادەنيەت جانە سپورت ءمينيسترى ارىستانبەك مۇحامەدي ۇلى استاناعا ورالعان پاراليمپيادا قۇراماسىن قارسى الۋ كەزىندە تىلشىلەرگە بەرگەن سۇحباتىندا ءمالىم ەتتى.

«استانادا 26- تامىزدا ريو وليمپياداسىنىڭ جۇلدەگەرلەرىمەن سالتاناتتى كەزدەسۋ بارىسىندا پرەزيدەنت پاراليمپيادا قاتىسۋشىلارىنىڭ سىياقى قورىن وليمپيادا قاتىسۋشىلارىنىڭ دەڭگەيىمەن تەڭەستىرۋدى تاپسىرعان بولاتىن. قازىرگى ۋاقىتتا ءبىز مينيسترلىكتە بارلىق قاجەتتى قۇجاتتاردى، ەسەپتەردى، دالەلدەمەلەردى دايىندادىق. بۇگىن رەسپۋبليكالىق بيۋدجەتتىك كوميسسيانىڭ وتىرىسى وتەدى، سوندا بۇل قۇجاتتاردى راستايمىز»، - دەدى مينيستر.

 وسىلايشا، ءبىرىنشى ورىن ءۇشىن سىياقى 5 ەسە - 50 مىڭنان 250 مىڭ ا ق ش دوللارىنا دەيىن، ەكىنشى ورىن ءۇشىن 4,3 ەسە - 35 مىڭنان 150 مىڭ ا ق ش دوللارىنا دەيىن، ال ءۇشىنشى ورىن ءۇشىن 25 مىڭنان 100 مىڭعا دەيىن ۇلعايتىلاتىن بولادى.

ەسكە سالايىق، قازاقستان رەسپۋبليكاسى ۇكىمەتىنىڭ قاۋلىسى بويىنشا، جۇلدەگەرلەرگە اقشالاي سىياقىدان بولەك باسپانا بەرىلەدى. ماسەلەن، التىن ەنشىلەگەن سپورتشىعا 3 بولمەلى پاتەر، كۇمىس مەدال يەگەرىنە 2 بولمەلى، ءۇشىنشى ورىنعا 1 بولمەلى پاتەر بەرىلۋى ءتيىس.

«پاراليمپيادا ويىندارىنان العان التىن جانە كۇمىس مەدالدار ەل تاريحىنىڭ العاشقى جۇلدەلەرى سانالادى. بۇل بارشا قازاقستان ءۇشىن ۇلكەن قۋانىش. ەڭ باستىسى، ارينە، بۇل ءبىزدىڭ سپورتشىلارىمىز ءۇشىن ۇلكەن باقىت. ءبىزدىڭ ماقساتىمىزدا جالپى مەدالدىك ەسەپكە ەنۋ بولماعان ەدى، ءبىزدىڭ ماقساتىمىز ريوعا 10 جولداما ۇتىپ، ويىندارعا قاتىسۋ بولاتىن»، - دەپ اعىنان جارىلدى ا. مۇحامەدي ۇلى.

بۇنىڭ الدىندا حابارلاعانىمىزداي، ريو- دە- جانەيرودا وتكەن XV جازعى پاراليمپيادا ويىندارىنا قاتىسقان قازاقستان سپورتشىلارى ەلگە ورالدى.

 ريودا وتكەن پاراليمپيادا ويىندارىندا قازاقستان قۇراماسى قورجىنىنا ەكى مەدال تۇسكەن بولاتىن. وتاندىق ءجۇزۋشى ءزۇلفيا عابيدۋللينا ەركىن ستيلمەن 100 مەتر قاشىقتىققا جۇزۋدەن الەم رەكوردىن جاڭارتىپ، تاۋەلسىز قازاقستان ءۇشىن پاراليمپيادانىڭ تۇڭعىش التىن مەدالىن جەڭىپ السا، 67 كەلىگە دەيىنگى سالماق دارەجەسىندە ونەر كورسەتكەن پاۋەرليفتەر راۋشان قويشىبايەۆا ويىنداردىڭ كۇمىس جۇلدەگەرى اتاندى.

اۆتور: جاسۇلان جولدىبايەۆ