قازاقستان مەن ۇلى بريتانيا اسكەري- تەحنيكالىق ىنتىماقتاستىق تۋرالى مەموراندۋمعا قول قويدى

استانا. قازاقپارات - ق ر قورعانىس مينيسترلىگىندە ۇلى بريتانيا جانە سولتۇستىك يرلانديا بىرىككەن كورولدىگى قورعانىس مينيسترلىگىنىڭ كەڭەيتىلگەن ەۋروپا جونىندەگى دەپارتامەنتىنىڭ باستىعى سايمون لونىڭ ساپارى شەڭبەرىندە قازاقستان مەن ۇلى بريتانيا قورعانىس ۆەدومستۆولارىنىڭ اراسىندا اسكەري- تەحنيكالىق ىنتىماقتاستىق تۋرالى مەموراندۋمعا قول قويىلدى، دەپ حابارلايدى mod.gov.kz.

 اتالمىش قۇجات قازاقستاندىق قورعانىس- ونەركاسىبى كەشەنىن دامىتۋ جانە قارۋ- جاراق پەن اسكەري تەحنيكانى جاڭعىرتۋ ماقساتىندا ەكىجاقتى بايلانىستى كەڭەيتۋگە ىقپال ەتەدى.

ايتا كەتەيىك، ۇلى بريتانيا جانە سولتۇستىك يرلانديا بىرىككەن كورولدىگىنىڭ قورعانىس مينيسترلىگىمەن اسكەري ىنتىماقتاستىق 1996 -جىلدان باستاپ ەكىجاقتى اسكەري ىنتىماقتاستىقتىڭ جىل سايىنعى جوسپارى بويىنشا جۇرگىزىلىپ كەلەدى.

ىنتىماقتاستىقتىڭ نەگىزگى باعىتى - «قازبريگ» اسكەري قىزمەتشىلەرىنە بريتاندىق اسكەري كونسۋلتاتيۆتىك- جاتتىقتىرۋ توبى نۇسقاۋشىلارىنىڭ «دالا قىرانى» وقۋ- جاتتىعۋى مەن ترەنينگتەردىڭ وتكىزىلۋىن قامتيتىن بىتىمگەرشىلىك دايىندىق بولىپ تابىلادى.

ودان باسقا، ۇلى بريتانيانىڭ اسكەري وقۋ ورىندارىندا قازاقستاندىق كادرلاردى دايارلاۋ جانە اسكەري ءبىلىم بەرۋ سالاسىنداعى ءوزارا ءىس- قيمىل جۇزەگە اسىرىلۋدا.