اۆستراليادا قاسيەتتى جارتاستىڭ جارىعىنان شىعا الماي قالعان تۋريستەردى قۇتقاردى

استانا. قازاقپارات - اۆستراليالىق تاۋلاردا جارتاستىڭ جارىعىنان شىعا الماي قالعان تۋريستەردى قۇتقارۋ ءۇشىن 11 ساعات ۋاقىت كەتتى.

بۇعان تىكۇشاق تارتىلدى، دەپ حابارلادى The Sydney Morning Herald باسىلىمى.

وقيعا دۇيسەنبى كۇنى، 19- قىركۇيەكتە ورىن الدى. 23 جاستاعى ءۇش اۆستراليالىق سولتۇستىك اۋماق وڭىرىندە ورنالاسقان اتاقتى ۋلۋرۋ تاۋىنا ساياحاتقا باردى. جارتاستىڭ جارىعىنا تۇسپەك بولعان جاستار تۋريستىك جولدان اۋىتقىپ، قايتا شىعا الماعان.

قۇتقارۋشىلار ولارعا دۇيسەنبى كۇنى كەشكە جەتتى. 20- قىركۇيەككە قاراعان ءتۇنى تۋريستەردى قاۋىپسىز جەرگە شىعاردى. سولتۇستىك اۋماقتىڭ جەدەل قىزمەتىنىڭ وكىلى ەر ادامداردىڭ زارداپ شەكپەگەنىن اتاپ ءوتتى. سونداي-اق ول ۋلۋرۋداعى جولدان شىقپاۋدى ەسكەرتتى، دەپ جازادى lenta.ru.

جارتاستىڭ بيىكتىگى 348 مەتردى قۇرايدى. ۋلۋرۋ ايگىلى تۋريستىك نىسان. ول بۇكىل الەمدىك يۋنەسكو مۇراسىنىڭ تىزىمىنە ەنگىزىلگەن.