جانىبەك ءالىمحان ۇلى: جاقىندا مەنى كاسىپقوي رينگتەن كورىپ قالۋلارىڭىز مۇمكىن
بۇل تۋرالى جانىبەك ءالىمحان ۇلى قازاقپارات تىلشىسىنە بەرگەن سۇحباتىندا ءمالىم ەتتى.
«قانات يسلامنىڭ الماتىدا وتەتىن جەكپە-جەگىن اسىعا كۇتىپ ءجۇرمىن. بۇل كۇنى مەنى دە كاسىپقوي رينگتەن كورىپ قالۋلارىڭىز مۇمكىن. اللا ءساتىن سالسا، 29- قازاندا كاسىپقوي بوكستان باعىمدى سىناپ كورسەم دەپ جوسپارلاپ جاتىرمىن. ازىرگە قارسىلاسىم بەلگىلى بولعان جوق. كىم ەكەنىن ناقتى بەلگىلى بولعاندا ايتا جاتارمىن. مەن كىممەن بولسا دا، جۇدىرىقتاسۋعا دايىنمىن»، - دەپ اتاپ ءوتتى جانىبەك ءالىمحان ۇلى.
«كاسىپقوي بوكسقا ءبىر جولا اۋىسىپ جاتىرسىز با؟» دەگەن سۇراعىمىزعا: «ازىرگە ناقتى شەشىم قابىلداعان جوقپىن. ونى جەكە باپكەرىممەن جانە باسقا دا وزىمە قول ۇشىن بەرىپ، كومەكتەسىپ جۇرگەن اعالارىممەن اقىلداسىپ الداعى ۋاقىتتا شەشەتىن بولامىز. قازىر ۇلتتىق قۇراما دەمالىپ جاتىر. وسى ورايدا كاسىپقوي بوكستان ءوزىمدى سىناپ كورەيىن دەگەن نيەتتەمىن. ءبىرجولا كاسىپقوي بوكستىڭ ەسىگىنەن كىرىپ، تورىنە شىعام دەپ شەشكەن جوقپىن ءالى»، - دەپ جاۋاپ بەردى بوكسشى.
اۆتور: كۇنسۇلتان وتارباي
