قىتايداعى قازاق بالالارى «قازاقستان داۋىسىنا» كەرەمەت پاروديا جاسادى - كەسكىن

 استانا. قازاقپارات - قىتاي ەلىندەگى قازاق بالالارى «داۋىس» دەپ اتالاتىن حالىقارالىق ءان جوباسىنا ءوزارا ۇيىمداسا وتىرىپ، ەزۋ تارتقىزار پاروديا جاساعان.

 بۇل كۇلكىلى ءارى شىنايى ءان جارىسى
 TencentVideo 讯视频:v.qq.com پورتالىنا جۇكتەلگەن ەكەن. YouTube - تىڭ بالاماسى ىسپەتتى «تىڭ شۇڭ» - قىتايدىڭ ەڭ ءىرى ونلاين ۆيدەو مەديا- پلاتفورماسى. مەديا- پالتفورمانى شامامەن 600 ميلليون ادام پايدالانادى ەكەن.

 بالالار ءان جارىسىنا «حالىقتىڭ قالاۋى» دەپ ات بەرگەن. «كونكۋرسانتاردىڭ» ءبىرى - گۇلەركە جۇمات قىزى. جۇرگىزۋشى ونى ساحناعا شاقىرعان سوڭ، ول «بالپاڭ- بالپاڭ بالاپانداي، تامساندىرعان تاماشاداي» دەپ ونەر تۋرالى ءان شىرقاپ شىعادى. بالالار ءۇشىن تەلەارنالاردان كورەتىن قىزىل كرەسلونىڭ، قىزىل تەتىكشە - دومالاق تاس، ءتىس پاستاسىنىڭ قابى - ميكروفوننىڭ قىزمەتىن اتقارعان.

 گۇلەركە ءان سالاپ بىتكەن سوڭ، «تالىمگەرلەردىڭ» جاسى ۇلكەنى « ءانىڭدى جاقسى ايتتىڭ. جوعارعى داۋىسىڭ وتە جوعارى، تومەنگى داۋىسىڭ وتە تومەن. دىبىسىڭ تايىپ تۇر. پىسىقتا. ماعان كەلسەڭ مەن سەنى اتاقتى ءانشى قىلامىن» دەپ گۇلەركەنى وزىنە تارتادى. كەلەسى ءبىر «تورەشى» بولسا وعان « ءانىڭ ءالى پىسپاي قالىپتى، ۇيىڭە بارىپ دايىندالىپ كەل» دەگەن اقىل ايتادى. ءۇشىنشى تورەشى كىشكەنتاي قىز ءاندى جاقسى ايتتى دەگەن پىكىردى ۇستانسا، ءتورتىنشى - ءۇش جىگىت تورەشىنىڭ اراسىنداعى قىز تالىمگەر گۇلەركەنىڭ كيىمىنە سىن ايتقان. «كيىمىڭدى جاقسىلاپ كيمەپسىڭ، بۇدان كەيىن كيىمىڭدى جاقسىلاپ كيىپ كەل. ماعان كەلسەڭ، مەن سەنى اتاقتى ءانشى قىلدىرامىن» ، - دەيدى. جوباعا قاتىسقان «بولاشاق جۇلدىز» كيىمىنە قاتىستى سىن ايتقان سوڭعى تالىمگەردى تاڭدايدى.

 بۇل «حالىق داۋىسى» قىتاي حالىق رەسپۋبليكاسىندا قازاقتار كوپ مەكەندەنگەن ايماقتىڭ بىرىندە تۇسىرىلگەن سياقتى. بالالار قازاقتىڭ كونە سوزدەرىن ارالاستىرىپ سويلەپ تۇر.